കയ്പമംഗലം : കാലം തെറ്റി തീരദേശത്ത് കാപ്‌സികം വിളഞ്ഞു. മതിലകം പഞ്ചായത്തിലെ പുന്നക്കബസാര്‍ കിഴക്ക് മൂന്നാക്കല്‍ റോഡില്‍ തട്ടാര്‍ക്കുഴി കാദറിന്റെ വീട്ടുവളപ്പിലാണ് കൗതുകം തീര്‍ത്ത് കാപ്‌സികം മുളക് വിളഞ്ഞത്. വീടിനോട് ചേര്‍ന്ന് ഗ്രോ ബാഗില്‍ കൃഷി ചെയ്ത 50 ഓളം കാപ്‌സികം മുളക് ചെടിയാണ് കാലം തെറ്റി കാര്‍ഷിക ലോകത്തിനു കൗതുകം തീര്‍ത്തത്. സാധാരണയായി കാപ്‌സികം വിഭാഗത്തില്‍ ഉള്‍പ്പെട്ട മുളക് ചെടി വേനല്‍ക്കാലത്താണ് വിളവ് നല്‍കാറുള്ളത്.
പക്ഷേ തട്ടാര്‍ക്കുഴി കാദറിന്റെ മികച്ച പരിപാലനവും ശ്രദ്ധയും കൊണ്ട് മുളക് ചെടിയില്‍ നിന്നും മുളകുകള്‍ വിളഞ്ഞു തുടങ്ങി. പച്ച നിറത്തില്‍ ഉണ്ട രൂപത്തിലാണ് കാപ്‌സികം മുളക്. ചില്ലി ചിക്കന്‍ ഉള്‍പ്പെടെയുള്ള കറികളിലെ ഒഴിവാക്കാനാകാത്ത ഒന്നാണ് കാപ്‌സികം. പ്രകൃതിയെ സ്‌നേഹിക്കുന്ന കാദര്‍, പൂര്‍ണമായും ജൈവ കൃഷി രീതിയിലാണ് തന്റെ കാപ്‌സികം മുളക് ചെടികളെയും പരിപാലിക്കുന്നത്. ഒരിക്കല്‍ പോലും രാസവളങ്ങളോ രാസകീടനാശിനികളോ കാദര്‍ ഉപയോഗിച്ചിട്ടില്ല.
60 കഴിഞ്ഞ കാദര്‍ക്ക തന്റെ ചെറിയ വീട്ടു പറമ്പില്‍ വെണ്ട, തക്കാളി, ഇഞ്ചി, വിവിധ മുളകുകള്‍ തുടങ്ങിയവയും കൃഷി ചെയ്യുന്നുണ്ട്. 55 കഴിഞ്ഞ ഈ കര്‍ഷകന്റെ വീട്ടുവളപ്പില്‍ റംബൂട്ടാനും വിളഞ്ഞു നില്ക്കുന്നുണ്ട്. മണ്ണിനെയും പ്രകൃതിയെയും സ്‌നേഹിക്കുന്ന ഈ കര്‍ഷകന്റെ കൊച്ചു കൃഷിയിടത്തിലെ കാപ്‌സികം മുളക് കാണാന്‍ മതിലകം കൃഷി ഭവനിലെ ഉദ്യോഗസ്ഥരും ജനപ്രതിനിധികളും എത്തിയിരുന്നു.