ഷൊര്‍ണൂര്‍: വാടാനാംകുര്‍ശ്ശി റെയില്‍വേ സ്‌റ്റേഷനില്‍ റോഡില്‍ മേല്‍പ്പാലം വേണമെന്ന ആവശ്യത്തിന് പതിറ്റാണ്ടുകളുടെ പഴക്കം.
പാലക്കാട് -പട്ടാമ്പി റോഡിലാണ് വാടാനാംകുര്‍ശ്ശി സ്‌റ്റേഷന്‍ ഉള്ളത്. ഷൊര്‍ണൂര്‍ - നിലമ്പൂര്‍, നിലമ്പൂര്‍-ഷൊര്‍ണൂര്‍, പാലക്കാട്-നിലമ്പൂര്‍, നിലമ്പൂര്‍-തിരുവനന്തപുരം തുടങ്ങി ഗുഡ്‌സ് ട്രെയിനുകളടക്കം പത്തില്‍ കൂടുതല്‍ ട്രെയിനുകള്‍ വാടാനാംകുര്‍ശ്ശി സ്റ്റേഷനില്‍ കൂടി കടന്നുപോകുന്നു. അതുകൊണ്ടു തന്നെ മിക്ക സമയങ്ങളിലും റെയില്‍വേ ഗേറ്റ് അടച്ചിടാന്‍ നിര്‍ബന്ധിതമാവുകയാണ്. റെയില്‍വേ ഗേറ്റിന്റെ ഇരുപുറത്തും റോഡില്‍ വാഹനങ്ങളുടെ നീണ്ട നിര പതിവു കാഴ്ചയാണ്.
സ്വകാര്യ ബസ്സുകളുടെ സമയക്രമം ഇതുമൂലം തെറ്റി പോകുന്നതു കൊണ്ട് ചില ബസുകള്‍ ട്രിപ്പ് മുടക്കുക പതിവാണ്. വാടാനാംകുര്‍ശ്ശിയില്‍ മേല്‍പാലം നിര്‍മ്മിക്കണമെന്നാവശ്യപ്പെട്ട് മുന്‍ എം.എല്‍.എ സി.പി മുഹമ്മദ് പല തവണ റെയില്‍വേ ഭരണാധികാരികളോട് ആവശ്യപ്പെട്ടിരുന്നു. റെയില്‍വേ ഉയര്‍ന്ന ഉദ്യോഗസ്ഥര്‍ സ്‌റ്റേഷന്‍ സന്ദര്‍ശിക്കുമ്പോഴും നിവേദനം പതിവുപോലെ നല്‍കാറുണ്ട്. പട്ടാമ്പി എം.എല്‍.എ മുഹമ്മദ് മുഹ്‌സിനും ഇതു സംബന്ധിച്ച് നിവേദനം നല്‍കിക്കഴിഞ്ഞു. മേല്‍പാലം നിര്‍മ്മിക്കണമെന്നാവശ്യപ്പെട്ട് ജനങ്ങള്‍ പ്രക്ഷോഭത്തിനൊരുങ്ങുകയാണ്.