ദുബൈ: ദുബൈ ഗ്ലോബൽ വില്ലേജിൽ ക്രിസ്‌തുമസ് ആഘോഷങ്ങൾക്ക് തുടക്കമായി. 22 ദിവസം നീളുന്ന വിവിധ പരിപാടികൾക്ക് ഇനി ​ഗ്ലോബൽ വില്ലേജ് സാക്ഷിയാവും. ലോകത്തിൻ്റെ വിവിധ ഭാഗങ്ങളിൽ നിന്നുള്ളവർ ക്രിസ്തുമസ് ആഘോഷിക്കാൻ ഗ്ലോബൽ വില്ലേജിലേക്ക് ഒഴുകിയെത്തും.

21 അടി ഉയരമുള്ള ക്രിസ്‌തുമസ് ട്രീയിൽ ദീപങ്ങൾ തെളിയിച്ചായിരുന്നു ദുബൈ ഗ്ലോബൽ വില്ലേജിലെ ആഘോഷം. കടലാസ് കഷണങ്ങൾ കൊണ്ട് ആകാശത്ത് നിന്ന് പെയ്യിക്കുന്ന മഞ്ഞ്, ചുവട് വെച്ച് എത്തുന്ന ഹിമക്കരടികൾ, കാഴ്‌ചക്കാരെ അഭിവാദ്യം ചെയ്യാൻ നൃത്തസംഘത്തിനൊപ്പമെത്തുന്ന ക്രിസ്തുമസ് പാപ്പ തുടങ്ങി നിരവധി കാഴ്‌ചകളൊരുക്കിയാണ് ദുബൈ ഗ്ലോബൽ വില്ലേജിലെ ക്രിസ്തു‌മസ് ആഘോഷം. 

ഈ വേദിയിൽ ഇനിയുള്ള ഓരോ രാത്രിയിലും അഞ്ച് തവണ ക്രിസ്‌തുമസ് പാപ്പയും സംഘവും ആഘോഷവുമായി എത്തും.  ക്രിസ്‌തുമസിൻ്റെ ഭാഗമായി 22 ദിവസം നീളുന്ന ആഘോഷങ്ങളാണ് ദുബൈ ഗ്ലോബൽ വില്ലേജിൽ ഒരുക്കിയിരിക്കുന്നത്. ജനുവരി അഞ്ച് വരെ മുടക്കമില്ലാതെ ഈ വേദിയിൽ ക്രിസ്തുമസ് ആഘോഷങ്ങൾ തുടരും.

Global Village in Dubai has begun its Christmas celebrations, offering a festive atmosphere and exciting events for visitors.