സിഡ്‌നി: ആസ്‌ത്രേലിയയിലെ കോമണ്‍വെല്‍ത്ത് ബാങ്കില്‍നിന്ന് 20 കോടി ഉപഭോക്താക്കളുടെ വിവരങ്ങള്‍ നഷ്ടമായി. വിവരങ്ങള്‍ നഷ്ടമായതായി സമ്മതിച്ച് ബാങ്ക് രംഗത്തെത്തി. പേര്, വിലാസം, അക്കൗണ്ട് നമ്പര്‍ എന്നിവയടങ്ങിയ വ്യക്തിഗത വിവരങ്ങളാണ് നഷ്ടമായത്. രണ്ട് മാഗ്‌നറ്റിക് ടേപ്പുകളിലായായിരുന്നു ഇവ സൂക്ഷിച്ചിരുന്നത്. ഈ ടേപ്പുകള്‍ നശിപ്പിക്കപ്പെടുകയാണുണ്ടായത്. 2016ലായിരുന്നു സംഭവം.
ഒരു സബ് കോണ്‍ട്രാക്ടറാണ് ടേപ്പുകള്‍ നശിപ്പിച്ചത്. ഇതുവരെ ബാങ്ക് ഇക്കാര്യം ഉപഭോക്താക്കളോട് വെളിപ്പെടുത്തിയിരുന്നില്ല. 15 വര്‍ഷത്തെ വിവരങ്ങളായിരുന്നു ടേപ്പുകളിലുണ്ടായിരുന്നത്. എന്നാല്‍ ടേപ്പുകളില്‍ പാസ്‌വേര്‍ഡുകളോ പിന്‍ നമ്പറുകളോ ഉണ്ടായിരുന്നില്ലെന്ന് ബാങ്ക് അറിയിച്ചു. സംഭവത്തില്‍ സ്വതന്ത്ര ഫോറന്‍സിക് അന്വേഷണം നടത്താനാണ് തീരുമാനം. ഉപഭോക്താക്കള്‍ക്കുണ്ടായ അസൗകര്യത്തിലും ആശങ്കയിലും കോമണ്‍വെല്‍ത്ത് ബാങ്കിന്റെ റീടെയ്ല്‍ ബാങ്കിങ് തലവന്‍ ആംഗസ് സുള്ളിവന്‍ മാപ്പു ചോദിച്ചു.