മലപ്പുറം: കൊണ്ടോട്ടി കരിപ്പൂരില്‍ ഒരു വീട്ടില്‍ നിന്ന് എം.ഡി.എം.എ പിടിച്ചെടുത്തു. 1.66 കിലോഗ്രാം എം.ഡി.എം.എയാണ് പൊലിസ് പിടികൂടിയത്. മുക്കൂട് മുല്ലാന്‍മടക്കല്‍ ആഷിഖിന്റെ വീട്ടില്‍ നിന്നാണ് പൊലിസും ഡാന്‍സാഫ് സ്‌ക്വാഡും ചേര്‍ന്ന് എം.ഡി.എം.എ പിടിച്ചത്. ലഹരിയുമായി ബന്ധപ്പെട്ട കേസില്‍ രണ്ട് ദിവസം മുമ്പ് മട്ടാഞ്ചേരി പൊലിസ് അറസ്റ്റ് ചെയ്തയാളാണ് ആഷിഖ്.

തിങ്കളാഴ്ച പുലര്‍ച്ചെയായിരുന്നു റെയ്ഡ്. ഒമാനില്‍ നിന്നും പ്രതിക്ക് കഴിഞ്ഞ ദിവസം ഒരു പാഴ്‌സല്‍ വന്നിട്ടുണ്ടെന്ന് ജില്ല പൊലിസ് മേധാവിക്ക് രഹസ്യ വിവരം ലഭിച്ചിരുന്നു. ഇതിന്റെ അടിസ്ഥാനത്തില്‍ ജില്ല പൊലിസ് മേധാവിയുടെ നിര്‍ദേശ പ്രകാരമാണ്  വീട് റെയ്ഡ് ചെയ്തത്.

 പിടികൂടിയ രാസലഹരിക്ക് 50 ലക്ഷത്തോളം രൂപ വിലവരുമെന്നാണ് സൂചന. മൊത്തവിതരണവുമായി ബന്ധപ്പെട്ട പൊലിസിന്റെ അന്വേഷണത്തിലാണ് ഇത്രയധികം രാസലഹരി പിടികൂടാനായത് എന്നും റിപ്പോര്‍ട്ടുകള്‍ പറയുന്നു. 

Police and the DANSAF squad seized 1.66 kg of MDMA from the house of Ashiq in Karipur, Malappuram. Ashiq was previously arrested by Mattancherry police in a drug-related case.