തൊടുപുഴ: വേനല്‍മഴ ശക്തമായതോടെ തൊടുപുഴ കെ.എസ്.ആര്‍.ടി.സി ഡിപ്പോയില്‍ വെള്ളക്കെട്ട് രൂക്ഷമായി. ഇത് യാത്രക്കാരേയും ജീവനക്കാരേയും ദുരിതത്തിലാക്കുന്നു. ടാറിങ്ങെല്ലാം തകര്‍ന്നു കുണ്ടും കുഴിയുമായി കിടക്കുന്ന ഡിപ്പോയുടെ അവസ്ഥ ദയനീയമാണ്. തൊടുപുഴ ഡിപ്പോയിലെ അറുപതിലേറെ ബസുകളും മറ്റ് ഡിപ്പോകളില്‍ നിന്ന് ഇതുവഴി കടന്നു പോകുന്ന നൂറിലേറെ ബസുകളും വന്നു പോകുന്ന ഡിപ്പോയുടെ സ്ഥിതി പരിഹരിക്കാന്‍ ഇതുവരെ നടപടികളായിട്ടില്ല.
ബസില്‍ കയറാനെത്തുന്ന യാത്രക്കാരാണ് ഏറെ ദുരിതം അനുഭവിക്കുന്നത്. കുണ്ടും കുഴിയുമായി കിടക്കുന്ന സ്റ്റാന്‍ഡിലൂടെ ബസുകള്‍ കടന്നു വരുമ്പോള്‍ ചെളിവെള്ളം തെറിച്ച് യാത്ര തന്നെ പാതിവഴിയില്‍ മുടങ്ങുന്ന സ്ഥിതിയാണിവിടെ.
ചെളിവെള്ളം കെട്ടിക്കിടക്കുന്ന സ്റ്റാന്‍ഡിലൂടെ 'നീന്തി' വേണം ജീവനക്കാര്‍ ജോലി ചെയ്യാന്‍. ഡിപ്പോയിലെ മെക്കാനിക്കല്‍ വിഭാഗം ജീവനക്കാരുടെ സ്ഥിതിയാണ് ഏറെ ദയനീയം. ചെളി വെള്ളത്തില്‍ പാര്‍ക്ക് ചെയ്തിരിക്കുന്ന ബസിന്റെ അടിയില്‍ കയറി തകരാര്‍ പരിഹരിക്കേണ്ട അവസ്ഥയാണ് ഈ വിഭാഗത്തിലെ ജീവനക്കാര്‍ക്ക്.
തൊടുപുഴയില്‍ പുതിയ സ്റ്റാന്‍ഡ് നിര്‍മിക്കുന്നതിനാണ് നഗരസഭയുടെ അധീനതയിലുള്ള ലോറി സ്റ്റാന്‍ഡിലേക്ക് നാല് വര്‍ഷം മുന്‍പ് ഡിപ്പോ മാറ്റിയത്. രണ്ട് വര്‍ഷത്തിനുള്ളില്‍ സ്റ്റാന്‍ഡിന്റെ പണി പൂര്‍ത്തിയാക്കി അവിടേക്ക് മാറ്റുമെന്നാണ് അന്നത്തെ മന്ത്രിയും ബന്ധപ്പെട്ട ഉദ്യോഗസ്ഥരും പറഞ്ഞിരുന്നത്. എന്നാല്‍ വര്‍ഷം നാലാകാറായിട്ടും ഇതേ വരെ സ്റ്റാന്‍ഡ് ഉദ്ഘാടനം ചെയ്യാന്‍ സാധിച്ചിട്ടില്ല.
കോടികള്‍ മുടക്കി സ്റ്റാന്‍ഡ് നിര്‍മിച്ചെങ്കിലും മറ്റ് ചില അത്യാവശ്യ നിര്‍മാണ പ്രവര്‍ത്തനങ്ങള്‍ നടത്താത്തതാണ് പുതിയ സ്റ്റാന്‍ഡിന്റെ ഉദ്ഘാടനം അനന്തമായി നീളുന്നതിനു കാരണമെന്നാണ് പരാതി.
നിര്‍മാണം പൂര്‍ത്തിയായിട്ടുള്ള പുതിയ സ്റ്റാന്‍ഡിന്റെ ഉദ്ഘാടനം എത്രും വേഗം നടത്തി യാത്രക്കാരുടെയും ജീവനക്കാരുടെയും ദുരിതത്തിന് പരിഹാരം ഉണ്ടാക്കണമെന്നാണ് ആവശ്യം.