പോത്തന്‍കോട്: എസ്.എസ്.എല്‍.സി പരീക്ഷയില്‍ എല്ലാ വിഷയത്തിനും എ പ്ലസ് നേടിയ ഇരട്ടക്കുട്ടികള്‍ അഭിനന്ദന പ്രവാഹത്തില്‍. പോത്തന്‍കോട് ശാന്തിഗിരി ചെറുവല്ലി ഗ്രീന്‍ലാന്റില്‍ ഷംനാദിന്റെയും അധ്യാപികയായ ജാസ്മിയുടെയും മക്കളായ നൂറയും നൂഹയുമാണ് എല്ലാ വിഷയത്തിനും എ പ്ലസ് നേടിയത്.
പോത്തന്‍കോട് ലക്ഷ്മിവിലാസം ഹൈസ്‌കൂളില്‍ പഠിച്ചാണ് ഇവര്‍ മികച്ച വിജയം നേടിയത്. ഒന്നാം ക്ലാസുമുതല്‍ പത്തുവരെയും ഒരേ ക്ലാസിലായിരുന്നു ഇരട്ടകളുടെ പഠനം. ഇരുവര്‍ക്കും ചിത്രരചനയിലാണ് താല്‍പര്യമെങ്കിലും ഭാവി ആഗ്രഹങ്ങള്‍ വ്യത്യസ്തമാണ്. ഗണിതശാസ്ത്രത്തില്‍ ലെക്ചറര്‍ ആകാനാണ് നൂറക്ക് താല്‍പര്യമെങ്കില്‍ നൂഹക്ക് ഡോക്ടറാകാനാണ് ആഗ്രഹം. ഇവരുടെ അനുജത്തി നഹിത ഈ വര്‍ഷം ഒന്നാം ക്ലാസില്‍ ചേരുന്നതേയുള്ളു.
പിതാവ് നൗഷാദ് പ്രവാസിയാണ്. മാതാവ് ജാസ്മി വെഞ്ഞാറമൂട് ഗവ. ഹയര്‍ സെക്കന്‍ഡറി സ്‌കൂളിലെ ഹൈസ്‌കൂള്‍ അധ്യാപികയാണ്. ഇവരുടെ സ്‌കൂളില്‍ പത്താം ക്ലാസില്‍ എട്ടു ജോഡി ഇരട്ടക്കുട്ടികള്‍ പരീക്ഷ എഴുതിയെങ്കിലും എല്ലാ വിഷയത്തിനും എ പ്ലസ് ലഭിച്ചത് ഇവര്‍ക്ക് മാത്രമാണ്.