ആലത്തൂര്‍: സബ്ട്രഷറിയില്‍ 10 രൂപ, 50 രൂപ, 100 രൂപ സ്റ്റാമ്പ് പേപ്പറുകള്‍ കിട്ടാതായിട്ട് അഞ്ചു മാസത്തോളമായി ഇതുമൂലം പാവപ്പെട്ട ജനങ്ങളും, വിദ്യാര്‍ഥികളും, ഉദ്യോഗാര്‍ഥികളും വലയുന്നു. വയനാട്ടില്‍ ഈ മാസം 15ന് നടക്കുന്ന കരസേന റിക്രൂട്ട്‌മെന്റ് പോവാന്‍ 10 രൂപയുടെ സ്റ്റാമ്പ് പേപ്പറാണാവശ്യം ഇതിന് 500 രൂപയുടേത് വാങ്ങണം. മാത്രമല്ല പഞ്ചായത്തില്‍ മേല്‍പ്പുരക്ക് അപേക്ഷിക്കുവാന്‍ 100 രൂപയുടേതും, കെ.എസ്.ഫി.ഇയിലേക്ക് 25 രൂപയുടെതും, ബാങ്കിലേക്ക് 200 രൂപയുടേതുമാണാവശ്യം. ഇതിനെല്ലാം 500 രൂപയുടെ സ്റ്റാമ്പ് പേപ്പര്‍ വാങ്ങേണ്ട ഗതികേടിലാണ്. ഇതിന് എത്രയും പെട്ടെന്ന് പരിഹാരം കാണാന്‍ വേണ്ട നടപടികള്‍ സ്വീകരിക്കണമെന്നാവശ്യപ്പെട്ട് ആലത്തൂര്‍ മണ്ഡലം കോണ്‍ഗ്രസ് കമ്മിറ്റി പ്രസിഡന്റ് എം. മുഹമ്മദ് കുട്ടി ആലത്തൂര്‍ സബ്ട്രഷറി ഓഫിസര്‍ക്ക് പരാതി നല്‍കി.