കരുളായി: ചക്കയില്‍നിന്നും വൈവിധ്യമാര്‍ന്ന വിഭവങ്ങള്‍ പാകം ചെയ്ത് മൂത്തേടം പഞ്ചായത്ത് ചക്ക മഹോത്സവം സംഘടിപ്പിച്ചു. വിരമിച്ച അധ്യാപകരുടെ കൂട്ടായ്മയുടെ സഹകരണത്തോടെ മൂത്തേടം കുടുംബശ്രീയുടെ ആഭിമുഖ്യത്തിലാണ് ചക്ക മഹോത്സവം സംഘടിപ്പിച്ചത്. ചക്കയുടെ വിവിധ വസ്തുക്കള്‍ ചേര്‍ത്ത് കൊ@ുള്ള ബിരിയാണി, വൈന്‍, ചോക്ക്‌ളേറ്റ്, ഷെയ്ക്ക്, ചമ്മന്തി, അച്ചാര്‍, പായസം, കട്‌ലറ്റ്, മസാല പൊരി, ഉണ്ണിയപ്പം, ഐസ്‌ക്രീം, ജാക് ഹണി, മാള്‍ട്, പത്തിരി, ചിപ്‌സ്, സോസ്, പുട്ട്, അട, ലഡു തുടങ്ങി പലഹാരങ്ങളും കറികളും ഉള്‍പ്പെടെ നൂറിലധികം രുചിയേറും വിഭവമാണ് കുടുംബശ്രീ പ്രവര്‍ത്തകര്‍ പാകം ചെയ്ത് പ്രദര്‍ശനത്തിനും രുചി നോക്കാനുമായി ഒരുക്കിയത്.
ചക്ക മഹോത്സവം മൂത്തേടം പഞ്ചായത്ത് പ്രസിഡന്റ് സി.ടി രാധമണി ചക്ക പുഴുക്ക് തയാറാക്കാനുള്ള ചക്ക മുറിച്ചും, പഴുത ചക്ക വിതരണം ചെയ്തും ഉദ്ഘാടനം ചെയ്യ്തു.
സി.ഡി.എസ് പ്രസിഡന്റ് ഷബ്‌ന ഷാനവാസ് അധ്യക്ഷയായി. കെ രമണി, പഞ്ചായത്ത് സ്ഥിരംസമിതി അധ്യക്ഷന്‍ എന്‍.പി മജീദ്, ജാസ്മിന്‍ ഷറഫുദ്ദീന്‍, വിശ്വനാഥന്‍, ഉഷ സന്തോഷ്, മധു, സുകുമാര പണിക്കര്‍ തുടങ്ങിയവരും പഞ്ചായത്തംഗങ്ങളും സംസാരിച്ചു.