കണ്ണൂര്‍: പള്ളിക്കുന്ന് സര്‍വിസ് സഹകരണ ബാങ്ക് തിരഞ്ഞെടുപ്പില്‍ പി.കെ രാഗേഷ് നേതൃത്വം നല്‍കുന്ന ജനാധിപത്യ സംരക്ഷണ സമിതി വിജയത്തിലേക്ക്.
ആകെയുള്ള ഒന്‍പത് സീറ്റിലേക്കും ജനാധിപത്യ സംരക്ഷണ സമിതി മാത്രമാണ് പത്രിക സമര്‍പ്പിച്ചത്. രണ്ട് സെറ്റ് പത്രികകളാണ് സമിതി നല്‍കിയത്. ഡമ്മി സ്ഥാനാര്‍ഥികള്‍ ഇന്നലെ പത്രികള്‍ പിന്‍വലിച്ചു.
20നാണ് തിരഞ്ഞെടുപ്പ് നടക്കുക. എതിരാളികളില്ലാത്തതിനാല്‍ 20ന് പാനലില്‍ നിന്ന് ഒരാളെ പ്രസിഡന്റായി പ്രഖ്യാപിക്കുമെന്ന് പി.കെ രാഗേഷ് പറഞ്ഞു.
25 വര്‍ഷത്തോളം യു.ഡി.എഫ് ഭരണം നടത്തിയ ബാങ്കാണ് പി.കെ രാഗേഷ് വിട്ടതോടെ യു.ഡി.എഫിന് നഷ്ടമാകുകയായിരുന്നു. എന്നാല്‍ ബാങ്കില്‍ നിന്ന് പതിനായിരത്തോളം അംഗങ്ങളെ പുറത്താക്കിയിരുന്നു.
ഈ നടപടിക്കെതിരേ ഹൈക്കോടതി കേസ് നടക്കുന്നുണ്ടെന്നും ഈ കേസില്‍ വിധി വരാത്തതിനാലാണ് പത്രിക നല്‍കാത്തതാണെന്നാണ് യു.ഡി.എഫ് വാദം.