റിയാദ്: സഊദി രണ്ടാം കിരീടാവകാശിയും പ്രതിരോധ മന്ത്രിയുമായ മുഹമ്മദ് ബിൻ സൽമാനുമായി ട്രംപ് ഭരണകൂടം ഉടൻ കൂടിക്കാഴ്ച്ച നടത്തുമെന്ന് റിപ്പോർട്ട്. യുദ്ധം രൂക്ഷമായ യമനിലെ സ്ഥിതി ഗതികൾ വിലയിരുത്തി വേണ്ട നടപടികൾ കൈക്കൊള്ളാനാണ് കൂടിക്കാഴ്ചയെന്നാണ് റിപ്പോർട്ടുകൾ. യമനിലെ ഔദ്യോഗിക സർക്കാരിന് വേണ്ടി സഊദിയുടെ നേതൃത്വത്തിൽ കനത്ത യുദ്ധം നടക്കുന്നതിനിടെ യമനിലെ മറ്റൊരു ശക്തി വിഭാഗമായ അൽ ഖാഇദക്കെതിരെ അടുത്തിടെ അമേരിക്ക ആക്രമണം ശക്തമാക്കിയിരുന്നു. ട്രംപ് ഭരണകൂടം യമനിലെ യുദ്ധത്തിൽ കൂടുതൽ കൈകടത്തൽ നടത്താൻ ആഗ്രഹിക്കുന്നതായാണ് റിപ്പോർട്ടുകൾ. ഏതാനും ആഴ്ച്ചകൾക്കുള്ളിൽ നടക്കുന്ന കൂടിക്കാഴ്ച്ചയിൽ യമനിലെ സ്ഥിതിഗതികൾ നിയന്ത്രിക്കുന്നതിന് സംയുക്ത തീരുമാനം ഉണ്ടാകും.  കഴിഞ്ഞ മാസം അമേരിക്കൻ സെനറ്റർ ജോൺ മക്കെയിനുമായി പ്രിൻസ് മുഹമ്മദ് ബിൻ സൽമാൻ പ്രത്യേക കൂടിക്കാഴ്ച നടത്തിയിരുന്നു.