കോഴിക്കോട്: ദേശീയ ചലച്ചിത്ര പുരസ്‌കാര വിതരണ ചടങ്ങ് ഒരു വിഭാഗം സിനിമാ പ്രവര്‍ത്തകര്‍ ബഹിഷ്‌കരിച്ചത് തെറ്റായ നടപടിയായാണെന്ന് ബോളിവുഡ് സൂപ്പര്‍ താരം സുനില്‍ഷെട്ടി. അനാവശ്യ വിവാദം ദേശീയ പുരസ്‌കാരത്തിന്റെ ശോഭ കെടുത്തിയെന്നും അദ്ദേഹം കോഴിക്കോട്ട് മാധ്യമ പ്രവര്‍ത്തകരോടു പറഞ്ഞു.
രാജ്യത്തിനെ സംബന്ധിച്ചിടത്തോളം അഭിമാനാര്‍ഹമായ പുരസ്‌കാരമാണിത്. ആര് തരുന്നു എന്നതിലല്ല കാര്യം. അത് സ്വീകരിക്കുകയായിരുന്നു വേണ്ടത്. പുരസ്‌കാര ദാനവുമായി ബന്ധപ്പെട്ട് എന്തെങ്കിലും പരാതികളുണ്ടെങ്കില്‍ അക്കാര്യം ജൂറിയുമായി ചര്‍ച്ച ചെയ്ത് പരിഹരിക്കുകയായിരുന്നു വേണ്ടത്. മോഹന്‍ലാല്‍- പ്രിയദര്‍ശന്‍ കൂട്ടുകെട്ടില്‍ ഒരുങ്ങുന്ന 'മരയ്ക്കാര്‍ അറബിക്കടലിന്റെ സിംഹം' എന്ന ചിത്രത്തില്‍ അഭിനയിക്കാന്‍ പോവുന്നതിന്റെ ആകാംക്ഷയിലാണ് താനെന്ന് അദ്ദേഹം പറഞ്ഞു. ഈ വര്‍ഷം അവസാനം ചിത്രീകരണം തുടങ്ങും.
സിനിമാ താരങ്ങളുടെ സി.സി.എല്‍ ക്രിക്കറ്റില്‍ മോഹന്‍ലാലിനൊപ്പം കളിക്കാന്‍ കഴിഞ്ഞത് വലിയ അനുഭവമായിരുന്നെന്ന് അദ്ദേഹം പറഞ്ഞു. കൊച്ചിയിലെ സ്റ്റേഡിയത്തില്‍ മമ്മൂട്ടി വന്നപ്പോഴുള്ള ആരവവും സുനില്‍ഷെട്ടി അനുസ്മരിച്ചു.