ശാസ്താംകോട്ട(കൊല്ലം):അര്‍ബുദരോഗിയായ മാതാവിനെ സന്ദര്‍ശിക്കാന്‍ ബംഗളൂരുവിലെ പ്രത്യേക കോടതിയുടെ അനുമതിയോടെ കേരളത്തിലെത്തിയ അബ്ദുല്‍ നാസര്‍ മഅ്ദനി മടങ്ങി. കഴിഞ്ഞ 4 നാണ് മഅ്ദനി ജന്മനാട്ടില്‍ എത്തിയത്. 11 വരെ കേരളത്തില്‍ തങ്ങാന്‍ അനുമതിയുണ്ടായിരുന്നുവെങ്കിലും കര്‍ണാടക തെരഞ്ഞെടുപ്പ് കാരണം പെട്ടെന്ന് മടങ്ങണമെന്ന പൊലിസ് നിര്‍ദേശത്തെ തുടര്‍ന്നാണ് നേരത്തേ മടങ്ങിയത്.
നെടുമ്പാശ്ശേരിയില്‍ നിന്ന് ഇന്നലെ രാത്രി 10.55നുള്ള എയര്‍ഏഷ്യാ വിമാനത്തില്‍ ഭാര്യ സൂഫിയ മഅ്ദനി,പി.ഡി.പി സംസ്ഥാന ജനറല്‍ സെക്രട്ടറി മുഹമ്മദ് റജീബ്, നേതാക്കളായ നൗഷാദ് , സലിംബാബു, സഹായികളായ സിദ്ദീഖ്, ബംഗളൂരു പൊലിസിലെ സി.ഐ.മാരായ മാരുതി, ഷെ റാവുത്തര്‍ എന്നിവര്‍ക്കൊപ്പമാണ് മടങ്ങിയത്.
കഴിഞ്ഞ ദിവസങ്ങളില്‍ അന്‍വാര്‍ശ്ശേരിയില്‍ സോമപ്രസാദ് എം.പി, എം.എല്‍.എമാരായ കോവൂര്‍ കുഞ്ഞുമോന്‍, പി.ടി.എ റഹിം, കാരാട്ട് റസാഖ്, ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞ് മൗലവി, വിവിധ സംഘടന നേതാക്കളായ ഹമീദ് വാണിയമ്പലം, ശ്രീജ നെയ്യാറ്റിന്‍കര, കെ.എം ഷെഫിഖ്, കെ. പി അബൂബക്കര്‍ ഹസ്രത്ത്, കെ.ഡി.എഫ് നേതാവ് കെ രാമഭദ്രന്‍, ആറ്റിങ്ങല്‍ അബ്ദുല്‍ അസീസ് മൗലവി, അസീസിയ അസീസ്, യൂനുസ് കുഞ്ഞ് എന്നിവരും സംസ്ഥാനത്തിന്റെ വിവിധ ഭാഗങ്ങളിലുള്ള ആയിരക്കണക്കിന് ആളുകളും മഅ്ദനിയെ സന്ദര്‍ശിച്ചു.