ചെറുപുഴ: കോഴിച്ചാലില്‍ ജനകീയ പ്രക്ഷോഭത്തെത്തുടര്‍ന്ന് അടച്ചുപൂട്ടിയ കുപ്പിവെള്ള കമ്പനി വീണ്ടും തുറക്കുന്നതുമായി ബന്ധപ്പെട്ട് ചെറുപുഴ പഞ്ചായത്ത് ഹാളില്‍ സര്‍വകക്ഷി യോഗം വിളിച്ചു ചേര്‍ത്തു. മൂന്നു വര്‍ഷം മുന്‍പാണ് കോഴിച്ചാലില്‍ കുപ്പിവെള്ളക്കമ്പനി പ്രവര്‍ത്തനം തുടങ്ങിയത്. പ്രദേശത്തിന്റെ പരിസ്ഥിതി നിലവാരം കണക്കിലെടുത്ത് കമ്പനി നിര്‍ത്തണമെന്ന ആവശ്യവും കോടതി വിധിയും ചര്‍ച്ച ചെയ്യുന്നതിനാണ് സര്‍വകക്ഷി യോഗം വിളിച്ചത്. വിവിധ രാഷ്ട്രീയ കക്ഷി പ്രതിനിധികള്‍, വ്യാപാരി വ്യവസായി സംഘടനാ പ്രതിനിധികള്‍, ആക്ഷന്‍ കമ്മിറ്റി ഭാരവാഹികള്‍ പങ്കെടുത്തു. പഞ്ചായത്ത് പ്രസിഡന്റ് കൊച്ചുറാണി ജോര്‍ജ് അധ്യക്ഷയായി. യോഗത്തില്‍ മാധ്യമ പ്രവര്‍ത്തകര്‍ക്കെതിരേ പഞ്ചായത്ത് പ്രസിഡന്റ് വിലക്ക് എര്‍പ്പെടുത്തിയത് ശക്തമായ പ്രതിഷേധത്തിന് ഇടയാക്കി.