പൊന്നാനി: പുതുപൊന്നാനി പാലം കാണാനെത്തിയ നാലംഗസംഘത്തെ ഭീഷണിപ്പെടുത്തി പണം കവര്‍ന്ന സംഘത്തിലെ പ്രധാനിയെ അറസ്റ്റ് ചെയ്തു.
പുതുപൊന്നാനി സ്വദേശി മശ്ഹൂദ് ( 24 ) ആണ് അറസ്റ്റിലായത്. കൂട്ടുപ്രതികളായ രണ്ടുപേര്‍ക്കെതിരേ തിരച്ചില്‍ ഊര്‍ജിതമാക്കിയിട്ടുണ്ട്. ചൊവ്വാഴ്ച വളാഞ്ചേരിയില്‍ നിന്നും ഉച്ചയോടെ പുതുപൊന്നാനി പാലം കാണാനെത്തിയ നാലംഗ സംഘം ഫോട്ടോകള്‍ എടുക്കുന്നതിനിടെ മശ്ഹൂദിന്റെ നേതൃത്വത്തിലുള്ള മൂന്നംഗ സംഘം കഞ്ചാവ് ഉപയോഗക്കാരാണെന്ന് പറഞ്ഞ് ഭീഷണിപ്പെടുത്തി പേഴ്‌സില്‍ നിന്ന് പണം തട്ടിയെടുക്കുകയായിരുന്നു. പ്രതികള്‍ സ്ഥിരമായി മദ്യപിക്കുന്ന സ്ഥലമായിരുന്നു അത്. ഇവരുടെ പരാതി പ്രകാരം പൊന്നാനി എസ് ഐ സണ്ണി ചാക്കോയുടെ നിര്‍ദേശത്തില്‍ എ എസ് ഐ ആല്‍ബര്‍ട്ട്, പ്രദീപ്, സനോജ് എന്നിവര്‍ ചേര്‍ന്നാണ് പ്രതിയെ പിടികൂടിയത്.
കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്റ് ചെയ്തു.