തിരുവനന്തപുരം: പൊലിസ് അസോസിസേഷന്‍ സംസ്ഥാന സമ്മേളനത്തിലെ രക്തസാക്ഷി സ്തൂപത്തില്‍ മാറ്റം.നേരത്തെ ചുവപ്പായിരുന്ന സ്തൂപത്തിന്റെ നിറം നീലയും ചുവപ്പുമാക്കി. രക്തസാക്ഷികള്‍ സിന്ദാബാദ് എന്ന മുദ്രാവാക്യം പൊലിസ് അസോസിയേഷന്‍ സിന്ദാബാദ് എന്നും ആക്കി മാറ്റി. ഉന്നത നിര്‍ദ്ദേശത്തെ തുടര്‍ന്നാണ് മാറ്റമെന്നാണ് സൂചന.

പൊലിസ് അസോസിയേഷനില്‍ രാഷ്ട്രീയ അതിപ്രസരമെന്ന് ഇന്റലിജന്‍സ് മേധാവി റിപ്പോര്‍ട്ട് നല്‍കിയിരുന്നു. പൊലിസ് സേനയില്‍ മുന്‍പെങ്ങുമില്ലാത്തവിധം രാഷ്ട്രീയപ്രവര്‍ത്തനം നടക്കുന്നതായും നിയന്ത്രിച്ചില്ലെങ്കില്‍ ഗുരുതര വിപത്തിലേക്ക് ചെന്നെത്തുമെന്നും ഇന്റലിജന്‍സ് മേധാവി എ.ഡി.ജി.പി ടി.കെ വിനോദ്കുമാര്‍ മുഖ്യമന്ത്രിക്കും പൊലിസ് മേധാവി ലോക്‌നാഥ് ബെഹ്‌റക്കും നല്‍കിയ റിപ്പോര്‍ട്ടില്‍ പറയുന്നു. പൊലിസ് അസോസിയേഷന്‍ സമ്മേളനങ്ങളില്‍ രക്തസാക്ഷി അനുസ്മരണം നടത്തിയതും മുദ്രാവാക്യം വിളിച്ചതും നിയമവിരുദ്ധമാണെന്നും റിപ്പോര്‍ട്ടില്‍ പരാമര്‍ശമുണ്ടായിരുന്നു.