അബുദബി: ദീർഘദൂര റോഡ് യാത്രകൾക്ക് മുമ്പ് വാഹനങ്ങൾ നിർബന്ധമായും പരിശോധിക്കണമെന്ന് യുഎഇ ആഭ്യന്തര മന്ത്രാലയം (Ministry of Interior) വാഹനയാത്രികർക്ക് മുന്നറിയിപ്പ് നൽകി. യാത്രയ്ക്കിടെ വാഹനത്തകരാറുകളും അപകടങ്ങളും ഒഴിവാക്കി സുരക്ഷിതമായ യാത്ര ഉറപ്പാക്കുന്നതിനാണ് ആറ് പ്രധാന പരിശോധനകൾ നിർദേശിച്ചിരിക്കുന്നത്.

വാഹനത്തിന്റെ പതിവ് സർവീസും അറ്റകുറ്റപ്പണികളും കൃത്യമായി നടത്തണമെന്ന് മന്ത്രാലയം അറിയിച്ചു. യാത്ര ആരംഭിക്കുന്നതിന് മുമ്പ് എഞ്ചിന്റെ കൂളിംഗ് സിസ്റ്റം പരിശോധിക്കണമെന്നും നിർദേശമുണ്ട്.

ടയറുകളുടെയും ബ്രേക്ക് സംവിധാനത്തിന്റെയും പ്രവർത്തനക്ഷമത ഉറപ്പാക്കണം. വാഹനത്തിലെ എല്ലാ ലൈറ്റുകളും ഇൻഡിക്കേറ്ററുകളും ശരിയായി പ്രവർത്തിക്കുന്നുണ്ടോ എന്ന് പരിശോധിക്കണമെന്നും മന്ത്രാലയം പറഞ്ഞു.

റേഡിയേറ്ററിലെ വെള്ളത്തിന്റെ അളവ് മതിയായതാണോ എന്ന് ഉറപ്പാക്കുന്നത് അമിത ചൂടും മെക്കാനിക്കൽ തകരാറുകളും ഒഴിവാക്കാൻ സഹായിക്കുമെന്ന് അധികൃതർ വ്യക്തമാക്കി. എഞ്ചിൻ ഓയിലിന്റെ അളവും ഗുണനിലവാരവും പരിശോധിച്ച ശേഷമേ യാത്ര ആരംഭിക്കാവൂ എന്നും നിർദേശിച്ചിട്ടുണ്ട്.

ഈ മുൻകരുതലുകൾ പാലിക്കുന്നത് വാഹനത്തിന്റെ റോഡ് യോഗ്യത ഉറപ്പാക്കുന്നതിനും യാത്രക്കാരുടെ സുരക്ഷ വർധിപ്പിക്കുന്നതിനും സഹായിക്കുമെന്ന് ആഭ്യന്തര മന്ത്രാലയം അറിയിച്ചു.

യാത്രയ്ക്ക് മുമ്പ് നിർബന്ധമായും പരിശോധിക്കേണ്ട 6 കാര്യങ്ങൾ

* വാഹനത്തിന്റെ പതിവ് സർവീസ് പൂർത്തിയായിട്ടുണ്ടോ

* എഞ്ചിന്റെ കൂളിംഗ് സിസ്റ്റം

* ടയറുകളുടെയും ബ്രേക്കുകളുടെയും അവസ്ഥ

* ലൈറ്റുകളും ടേൺ ഇൻഡിക്കേറ്ററുകളും

* റേഡിയേറ്ററിലെ വെള്ളത്തിന്റെ അളവ്

* എഞ്ചിൻ ഓയിലിന്റെ നില

English Summary:

The UAE Ministry of Interior has advised motorists to carry out six essential vehicle safety checks before long-distance road trips. Drivers are urged to ensure routine maintenance, inspect the engine cooling system, check tyres and brakes, verify lights and indicators, maintain the radiator water level, and inspect engine oil. The ministry said these measures will improve road safety and help prevent breakdowns during travel.