കൊച്ചി: ഈ വര്‍ഷത്തെ ഹയര്‍ സെക്കന്‍ഡറി ഫലം വന്നപ്പോള്‍ ജില്ലയ്ക്ക് 86.11 ശതമാനം വിജയം. ജില്ലയില്‍ പരീക്ഷയെഴുതിയ 32277 വിദ്യാര്‍ഥികളില്‍ 27794 പേര്‍ ഉപരിപഠനത്തിനു യോഗ്യത നേടി. 1481 പേര്‍ക്ക് എല്ലാ വിഷയങ്ങള്‍ക്കും എപ്ലസ് ലഭിച്ചു.
ടെക്‌നിക്കല്‍ ഹയര്‍ സെക്കന്‍ഡറി വിഭാഗത്തില്‍ 473 പേര്‍ പരീക്ഷയെഴുതിയപ്പോള്‍ 406 പേര്‍ ഉപരിപഠനത്തിന് അര്‍ഹത നേടി. വിജയം 85.84 ശതമാനം. എട്ടു പേര്‍ക്ക് എല്ലാ വിഷയത്തിലും എ പ്ലസ് ലഭിച്ചു. കഴിഞ്ഞ വര്‍ഷം 87.42 ശതമാനം വിജയമുണ്ടായിരുന്നു. ഓപ്പണ്‍ സ്‌കൂള്‍ വിഭാഗത്തില്‍ 3970 പേരാണു പരീക്ഷയെഴുതിയത്.
1674 പേര്‍ ഉപരിപഠനത്തിന് അര്‍ഹത നേടി. വിജയശതമാനം 42.17. നാലു പേര്‍ക്കു എല്ലാ വിഷയങ്ങള്‍ക്കു എ പ്ലസ് ലഭിച്ചു. വൊക്കേഷണല്‍ ഹയര്‍ സെക്കന്‍ഡറി പരീക്ഷയില്‍ ജില്ലയില്‍ 80.53 ആണ് ജില്ലയിലെ വിജയശതമാനം. കഴിഞ്ഞ വര്‍ഷത്തെ അപേക്ഷിച്ച് നേരിയ തോതില്‍ വിജയശതമാനം വര്‍ധിച്ചു.
പോയ വര്‍ഷം വൊക്കേഷണല്‍ ഹയര്‍ സെക്കന്‍ഡറിയില്‍ 79.44 ശതമാനമായിരുന്നു ജില്ലയിലെ വിജയശതമാനം. ഈ വര്‍ഷം 2430 പേര്‍ പരീക്ഷയെഴുതിയപ്പോള്‍ 1957 പേര്‍ മൂന്നു പാര്‍ട്ടിലും വിജയിച്ച് ഉപരിപഠനത്തിന് അര്‍ഹത നേടി. ആറു പേര്‍ക്ക് എല്ലാ വിഷയത്തിനും എ പ്ലസ് ലഭിച്ചു. ഷിഫ ദൗലത്ത് (ഗവ. വി.എച്ച്.എസ്.എസ് നേര്യമംഗലം), വര്‍ഷ സന്തോഷ് (ഗവ. വി.എച്ച്.എസ്.എസ് തിരുമാറാടി), അപര്‍ണ ജെയിന്‍ (ഗവ. വി.എച്ച്.എസ്.എസ് മാതിരപ്പള്ളി), കെ.ആര്‍. വിഷ്ണുദത്ത് (ഗവ. വി.എച്ച്.എസ്.എസ്, ഞാറയ്ക്കല്‍), എസ്. ശിവദത്ത്, സാനിക സന്തോഷ് (ഇരുവരും സെന്റ് പീറ്റേഴ്‌സ് വി.എച്ച്.എസ്.എസ് കോലഞ്ചേരി) എന്നിവരാണു ജില്ലയില്‍ എല്ലാ വിഷയങ്ങള്‍ക്കു എ പ്ലസ് നേടിയത്.
മൂന്നു പാര്‍ട്ടിലും എല്ലാ വിദ്യാര്‍ഥികളെയും വിജയപ്പിച്ച ഒരു സ്‌കൂള്‍ മാത്രമാണു ജില്ലയിലുള്ളത്. ഗവ. വി.എച്ച്.എസ്.എസ് അമ്പലമുകള്‍. ഇവിടെ പരീക്ഷയെഴുതിയ 52 പേരും വിജയിച്ചു.
കഴിഞ്ഞ വര്‍ഷവും ഗവ. വി.എച്ച്.എസ്.എസ് അമ്പലമുകള്‍ 100 ശതമാന വിജയം കരസ്ഥമാക്കിയിരുന്നു.