ഹൈദരാബാദ്: ശിഖാര്‍ ധവാന്റെയും വില്യംസിന്റെയും മികച്ച ബാറ്റിങ്ങിന്റെ കരുത്തില്‍ സണ്‍റൈസസേഴ്‌സ് ഹൈദരാബാദിന് 9 വിക്കറ്റ് ജയം. അഞ്ച് വിക്കറ്റ് നഷ്ടത്തില്‍ ഡല്‍ഹി 187 റണ്‍സെടുത്തു. ഒരു വിക്കറ്റ് നഷ്ടത്തില്‍ ഹദരാബാദ് 191 റണ്‍സെടുത്തു. റിഷഭിന്റെ സെഞ്ചുറിക്കും ഡല്‍ഹിയെ രക്ഷിക്കാനായില്ല.
ടോസ് നേടിയ ഡല്‍ഹി ഡയര്‍ ഡെവിള്‍സ് മൂന്നു മാറ്റങ്ങളുമായി ബാറ്റിങ്ങിനിറങ്ങി. 11 പന്തില്‍ ഒന്‍പത് റണ്‍സുമായി പി. പി ഷായാണ് ആദ്യം മടങ്ങിയത്. ഷാക്കിബുല്‍ ഹസന്റെ പന്തില്‍ ദവാന്‍ ക്യാച്ചിലൂടെയായിരുന്നു ഷായുടെ മടക്കം. 13 പന്തില്‍ 11 റണ്‍സുമായി ജെ. ജെ റോയിയും കളംവിട്ടതോടെ ഡല്‍ഹി പതറുന്ന കാഴ്ചയായിരുന്നു. മൂന്നു റണ്‍സുമായാ ശ്രേയസ് ഐയര്‍ കൂടി പുറത്തായതോടെ ഡല്‍ഹി പാടെ തകര്‍ന്നു. എന്നാല്‍ പിന്നാലെ എത്തിയ റിഷഭ് പന്ത് കളം നിറഞ്ഞാടി. 63 പന്തില്‍ 128 റണ്‍സുമായി ഔട്ടാകാതെ പന്ത് ഡല്‍ഹിയുടെ മാനം കാത്തു.
പന്തിന്റെ മികച്ച ബാറ്റിങ്ങിന്റെ പിന്‍ബലത്തില്‍ അഞ്ചു വിക്കറ്റ് നഷ്ടത്തില്‍ ഡല്‍ഹി 187 റണ്‍സെടുത്തു. എച്ച്.ബി പട്ടേലും 24 റണ്‍സുമായി ഡല്‍ഹി നിരയില്‍ മികച്ചു നിന്നു. 17 പന്തില്‍ നിന്നാണ് പട്ടേല്‍ 24 റണ്‍സെടുത്തത്. എട്ടു പന്തില്‍ നിന്ന് ഒന്‍പത് റണ്‍സുമായി മാക്‌സ് വെല്ലും പുറത്തായി. ഹൈദരാബാദിന്റ ശാക്കിബുല്‍ ഹസന്‍ നാല് ഓവറില്‍ 27 റണ്‍സ് വഴങ്ങി രണ്ടു വിക്കറ്റാണ് നേടിയത്. നാല് ഓവര്‍ എറിഞ്ഞ ഭൂവനേശ്വര്‍ കുമാര്‍ 51 റണ്‍സ് വഴങ്ങി ഒരു വിക്കറ്റ് വീഴ്ത്തി. സിദ്ധാര്‍ഥ് കൗളിന്റെ നാലോറില്‍ വിക്കറ്റൊന്നും നേടാനാകാതെ 48 റണ്‍സ് വഴങ്ങി. മറുപടി ബാറ്റിങ്ങിനിറങ്ങിയ ഹൈദരാബാദിന്റെ അലക്‌സ് ഹാല്‍സ് 10 പന്തില്‍ 14 റണ്‍സെടുത്തു. പട്ടെലിന്റെ പന്തില്‍ എല്‍. ബി ഡബ്യൂ ആയാണ് ഹാല്‍സ് കളംവിട്ടത്.