കൊട്ടിയം: കൂട്ടുകാരന്റെ ജന്മദിനാഘോഷത്തില്‍ പങ്കെടുക്കാന്‍ പോയ പ്ലസ്ടു വിദ്യാര്‍ഥി പാറമടയിലെ കുളത്തില്‍ കുളിക്കാനിറങ്ങവെ മുങ്ങി മരിച്ചു. മൈലാപ്പൂര്‍ എ.കെ.എം.എച്ച്.എസ്സ്.എസിലെ പ്ലസ്ടു സയന്‍സ് ബാച്ചിലെ വിദ്യാര്‍ഥിയായ മേവറം തെങ്ങനഴി കം ശ്രീചിത്തിരയില്‍ സുരേഷിന്റെയും പരേതയായ ശ്രീലേഖയുടേയും മകനായ അഖില്‍ സുരേഷ് (17) ആണ് മരിച്ചത്.
വെള്ളിയാഴ്ച ഉച്ചയോടെ ചെമ്മരുത്തിക്കുന്നത്തുമല പാറമടയിലായിരുന്നു സംഭവം. ഒപ്പം പഠിക്കുന്ന സുഹൃത്തിന്റെ ജന്മദിനാഘോഷത്തില്‍ പങ്കെടുക്കാനെത്തിയ അഖില്‍ അഞ്ചു കൂട്ടുകാരൊടൊപ്പം പാറമടയില്‍ നീന്താനിറങ്ങവെ കുഴഞ്ഞ് വെള്ളത്തില്‍ താഴ്ന്നു പോകുകയായിരുന്നു. ഒപ്പമുണ്ടായിരുന്നവര്‍ ബഹളം വച്ചതിനെ തുടര്‍ന്ന് അഖിലിനെ പുറത്തെടുത്ത് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
മൃതദേഹം വര്‍ക്കലയിലെ ആശുപത്രിയില്‍ സൂക്ഷിച്ചിരിക്കുകയാണ്. സഹോദരന്‍: അമല്‍ സുരേഷ് (തഴുത്തല നാഷനല്‍ പബ്ലിക് സ്‌കൂളിലെ പത്താം ക്ലാസ്സ് വിദ്യാര്‍ഥി). കല്ലമ്പലം പൊലിസ് കേസെടുത്തു.