അലനല്ലൂര്‍ : അലനല്ലൂരില്‍ ചെരുപ്പ്കടക്ക് തീപിടിച്ച് സാധനങ്ങള്‍ കത്തി നശിച്ചു.ഇന്നലെ ഉച്ചക്ക് ഒന്നര മണിയോടെ ചന്തപ്പടിയിലെ തുര്‍ക്കീസ് ബില്‍ഡിങ്ങില്‍ താഴെ നിലയില്‍ പ്രവര്‍ത്തിക്കുന്ന തുര്‍ക്കീസ് ഫൂട്ട്മഹലിലാണ് തീപിടുത്തമുണ്ടായത്. ബാഗുകളും ചെരുപ്പുകളും കത്തിയമര്‍ന്നു.
അലനല്ലൂരിലെ അപ്പുള്ളി അനൂപ്കൃഷ്ണന്റെ കടക്കാണ് തീപിടുത്തമുണ്ടായത്. ഇരു നിലകളിലായി സജ്ജീകരിച്ച മുറിയിലെ താഴെ നിലയിലെ സാധനങ്ങള്‍ നശിച്ചു. ഏകദേശം രണ്ടര ലക്ഷം രൂപയുടെ നഷ്ടം കണക്കാക്കുന്നു. പുക ഉയരുന്നത് കണ്ട ഉടനെ സമീപവാസികളും ഓട്ടോ തൊഴിലാളികളും ചുമട്ടുതൊഴിലാളികളും വ്യാപാരികളും  ചേര്‍ന്ന് തീയണക്കാന്‍ ശ്രമിക്കുകയായിരുന്നു. മണ്ണാര്‍ക്കാട് വട്ടമ്പലത്തെ ഫയര്‍ സ്റ്റേഷനില്‍ നില്‍ നിന്നും അഗ്നിശമനസേന എത്തിയാണ് തീ പൂര്‍ണമായും അണച്ചത്. ഷോര്‍ട്ട് സര്‍ക്ക്യൂട്ടാണ് കാരണമെന്നാണ് നിഗമനം.
നാട്ടുകാരും അഗ്നിശമനസേനയും  തീയണക്കാന്‍ കഠിനമായി ശ്രമിച്ചത് സമീപത്തെ കടകളിലേക്ക് തീപടരുന്നത് ഒഴിവാക്കാനായി.പെരിന്തല്‍മണ്ണ സ്റ്റേഷനില്‍ നിന്ന് പിന്നീട് അഗ്നിശമന സേന എത്തിയിരുന്നു.അലനല്ലൂര്‍ കെ.എസ്.ഇ.ബി അധികൃതരും നാട്ടുകല്‍ പൊലിസും സ്ഥലത്ത് എത്തിയിരുന്നു.
സ്റ്റേഷന്‍ ഓഫിസര്‍ മൂസ വടക്കേതില്‍, ലീഡിംഗ് ഫയര്‍മാന്‍ പി.നാസര്‍, റിനോപോള്‍, കെ.ടി.രാജേഷ്, നിയാസുദ്ദീന്‍, സന്തോഷ്‌കുമാര്‍, ബബീഷ്, ജാഹിര്‍, ബിജു, ശ്രീജിത്ത്, കെ.മണികണ്ഠന്‍, പി.കെ.മുഹമ്മദാലി, അനില്‍കുമാര്‍ എന്നീ സേനാംഗങ്ങള്‍ നേതൃത്വം നല്‍കി. വെട്ടത്തൂര്‍ റോഡില്‍ അരമണിക്കൂറോളം ഗതാഗതം സ്തംഭിച്ചു.