തൃക്കരിപ്പൂര്‍: പരിസ്ഥിതി അതീവ ലോലപ്രദേശമായ വലിയപറമ്പ പഞ്ചായത്തിന്റെ വിവിധ ഭാഗങ്ങളില്‍ പുഴയിലും അഴിമുഖത്തുമായി നടന്നുകൊണ്ടിരിക്കുന്ന അനധികൃത മണലെടുപ്പിനെതിരേ സമരപ്രഖ്യാപനവുമായി മാവിലാക്കടപ്പുറം ദ്വീപ് ജനത രംഗത്ത്.
ദ്വീപിന്റെ നിലനില്‍പ്പ് തന്നെ അപകടത്തിലേക്കു നീങ്ങുന്ന സാഹചര്യത്തിലാണ് സമരവുമായി രംഗത്തുവരുന്നതെന്ന് വലിയപറമ്പ ഗ്രാമപഞ്ചായത്ത് പ്രസിഡന്റ് പറഞ്ഞു. ഇന്നു വൈകിട്ട് മൂന്നിനു മാവിലാക്കടപ്പുറം എം.എ.യു.പി സ്‌കൂളിലാണ് സമര പ്രഖ്യാപന കണ്‍വന്‍ഷന്‍ സംഘടിപ്പിക്കുന്നത്.
നാലുഭാഗവും ഉപ്പുവെള്ളത്താല്‍ ചുറ്റപ്പെട്ട വലിയപറമ്പ ദ്വീപിലെ ജനതയുടെ സൗഭാഗ്യമായിരുന്നു ശുദ്ധമായ കുടിവെള്ളം. എന്നാല്‍ ഇന്ന് ഉപ്പുവെള്ളമാണ് ഇവിടെ സമൃദ്ധമാണ് മാവിലാക്കടപ്പുറം പ്രദേശം.
നിയമങ്ങള്‍ കാറ്റില്‍ പറത്തി മറ്റു പ്രദേശത്തെ കടവുകളുടെ പേരുപറഞ്ഞ് കായലിലും കടലിലും ഒരുപോലെ മണലൂറ്റുകയായിരുന്നുവെന്നാണ് നാട്ടുകാരുടെ ആരോപണം. കുടിവെള്ളം ഇല്ലാതാക്കിയതിനു പുറമെ കായലിലെ മണലെടുപ്പ് ഇപ്പോള്‍ കായല്‍ കരയുടെ ഭാഗങ്ങള്‍ ഇടിഞ്ഞുതുടങ്ങി. പല വീടുകള്‍ക്കും കേടുപാടുകള്‍ സംഭവിച്ചു തുടങ്ങിയിട്ടുണ്ട്.
ഒരു ഭാഗം കടലും മൂന്നു ഭാഗം കായലുകളാലും ചുറ്റപ്പെട്ട വലിയപറമ്പ ദ്വീപില്‍ ശുദ്ധജലം സുലഭമായി നല്‍കിക്കൊണ്ടിരുന്നത് കായല്‍ക്കരയിലെയും കടല്‍ക്കരയിലെയും മണല്‍ തിട്ടകളും വയലുകളുമായിരുന്നു. മണലൂറ്റില്‍ മണല്‍ തിട്ടകള്‍ ഇല്ലാതാക്കിയതോടെ മഴവെള്ളം കായലിലേക്കും കടലിലേക്കും ഒഴുകി. ഇതു ദ്വീപിലാകെ ഉപ്പുവെള്ളമായി മാറി.
അനധികൃത മണലെടുപ്പ് തടയണമെന്നാവശ്യപ്പെട്ട് നിരവധി പരാതികള്‍ നല്‍കിയെങ്കിലും പരിഹാരമുണ്ടായില്ല. മണലെടുക്കാന്‍ നിയമങ്ങളും ചട്ടങ്ങളും ഉണ്ടെങ്കിലും ഇതൊന്നും മണല്‍ മാഫിയകള്‍ക്കു ബാധകമല്ല.
ഇത്തരത്തില്‍ വെള്ളത്തിലും കരയിലും ഓരേ പോലെ മണലൂറ്റ് തുടര്‍ന്നാല്‍ കാലക്രമേണ ഈ ദ്വീപ് ഇല്ലാതാകുമെന്ന ആശങ്കയും ദ്വീപ് ജനതക്കുണ്ട്. ഈ സാഹചര്യത്തിലാണ് കണ്‍വന്‍ഷന്‍ സംഘടിപ്പിക്കുന്നത്.