ചെറുതോണി; ഇടുക്കി മെഡിക്കല്‍ കോളജില്‍ വിദ്യാര്‍ഥികള്‍ക്കു പഠനത്തിനുള്ള അടിസ്ഥാന സൗകര്യങ്ങള്‍ ഒരുക്കാത്തതില്‍ പ്രതിഷേധിച്ച് മുഴുവന്‍ വിദ്യാര്‍ഥികളും ഇന്നു പഠിപ്പു മുടക്കി സമരം നടത്തും.
ഇന്നു രാവിലെ 10നു മെഡിക്കല്‍ കോളജിന് മുന്നില്‍ ആരംഭിക്കുന്ന സമരം അധികൃതരില്‍ നിന്നു വ്യക്തമായ ഉറപ്പു ലഭിക്കുന്നതുവരെ തുടരുമെന്നു വിദ്യാര്‍ഥി പ്രതിനിധികള്‍ പറഞ്ഞു.
രണ്ടാംവര്‍ഷ വിദ്യാര്‍ഥികള്‍ രോഗികളെ നേരില്‍ കണ്ടു രോഗവിവരങ്ങള്‍ അറിഞ്ഞു പഠിക്കേണ്ടതാണ്. എന്നാല്‍ ഇടുക്കി മെഡിക്കല്‍ കോളജിലെ വിദ്യാര്‍ഥികള്‍ക്ക് ഇതുവരെ ഒരു രോഗിയെ പോലും നേരില്‍ കാണാനുള്ള അവസരം ലഭിച്ചില്ലെന്നാണു വിദ്യാര്‍ഥികളുടെ പരാതി.
മറ്റു മെഡിക്കല്‍ കോളജുകളിലെ വിദ്യാര്‍ഥികള്‍ മികച്ച നിലയില്‍ പഠനം പൂര്‍ത്തികരിച്ച് മുന്നേറുമ്പോള്‍ ഇടുക്കി മെഡിക്കല്‍ കോളജിലെ കുട്ടികള്‍ അവഗണിക്കപ്പെടുകയാണെന്നാണ് വിദ്യാര്‍ഥികള്‍ പറയുന്നത്. ഇതു സര്‍ക്കാരിന്റെ ശ്രദ്ധയില്‍ കൊണ്ടുവരുന്നതിനാണു സമരം നടത്തുന്നത്.