ഇരിട്ടി: കാര്‍ഷിക മേഖലക്ക് മുന്‍തൂക്കം നല്‍കിയും ഹരിതഭംഗിക്കും ശുചിത്വത്തിനും ഊന്നല്‍നല്‍കിയും മുഴക്കുന്ന് ഗ്രാമപഞ്ചായത്തിന്റെ ബജറ്റ്. 10,32,45,879 കോടി രൂപ വരവും 10,21,00,000 കോടി ചെലവും പ്രതീക്ഷിക്കുന്ന ബജറ്റ് വൈസ് പ്രസിഡന്റ് പ്രീത ദിനേശന്‍ അവതരിപ്പിച്ചു.
നെല്ല്, തെങ്ങ്, കുരുമുളക്, ഇഞ്ചി, മഞ്ഞള്‍ തുടങ്ങിയ കൃഷികള്‍ക്കു മുന്‍ഗണന നല്‍കുന്ന ബജറ്റില്‍ എല്ലാ വീടുകളിലും മാവിന്‍തൈ എത്തിച്ച് നട്ടുപിടിപ്പിക്കുന്ന 'മാവ് ഗ്രാമം' പദ്ധതിയും പുഴ പുറംപോക്കില്‍ കശുമാവ് കൃഷിയും നിര്‍ദേശിക്കുന്നുണ്ട്. മൃഗസംരക്ഷണ മേഖലയില്‍ ക്ഷീര കര്‍ഷകര്‍ക്കും കോഴി, കാട, മത്സ്യകൃഷിക്കും മുന്‍ഗണന നല്‍കിയിട്ടുണ്ടണ്ട്.
ആദിവാസി ഭവനങ്ങളുടെ മോടിപിടിപ്പിക്കല്‍, തൊഴില്‍ ഉപകരങ്ങളുടെ വിതരണം, വിദ്യാര്‍ഥികള്‍ക്ക് സൈക്കിള്‍, ലാപ്‌ടോപ്പ്, നെല്ലിയാട് ബദല്‍ വിദ്യാലയത്തിന് കെട്ടിടം എന്നിവ ബജറ്റിലെ മറ്റു നിര്‍ദേശങ്ങളാണ്. തെരുവുകളില്‍ സോളാര്‍ ലൈറ്റ് സ്ഥാപിക്കാന്‍ 10 ലക്ഷം, പാലം റോഡുകള്‍ക്ക് ഒരു കോടി തുടങ്ങിയവ വകയിരുത്തി.
പ്രസിഡന്റ് ബാബു ജോസഫ് അധ്യക്ഷനായി. കെ.വി റഷീദ്, സുരേന്ദ്രന്‍ തച്ചോളി, എ. വനജ, കെ.കെ സജീവന്‍, പി.പി മുസ്തഫ, എം. രവീന്ദ്രന്‍, വിനീത, മിനിചന്ദ്രന്‍, കെ. ചന്ദ്രന്‍ സംസാരിച്ചു.