എടച്ചേരി: 2018-19 അധ്യയന വര്‍ഷത്തെ അധ്യാപക പരിശീലന പരിപാടി ഇന്നലെയോടെ സമാപിച്ചു. വിവിധ ബി.ആര്‍.സികള്‍ കേന്ദ്രീകരിച്ച് കഴിഞ്ഞ മാസം 25 മുതല്‍ ആരംഭിച്ച പരിപാടിയാണ് ഇന്നലെ അവസാനിച്ചത്. ജനറല്‍ കലണ്ടര്‍ പ്രകാരം പ്രവര്‍ത്തിക്കുന്ന സ്‌കൂള്‍ അധ്യാപകര്‍ ആദ്യ ബാച്ചിലും മുസ്‌ലിം കലണ്ടറില്‍ പ്രവര്‍ത്തിക്കുന്ന സ്‌കൂളുകളിലെ അധ്യപകര്‍ രണ്ടാം ബാച്ചിലുമാണ് പങ്കെടുത്തത്. മുന്‍ വര്‍ഷങ്ങളെ അപേക്ഷിച്ച് ഇപ്രാവശ്യം ഇംഗ്ലിഷ് ഭാഷക്ക് മാത്രമായി പ്രത്യേക പരിശീലന പരിപാടി സംഘടിപ്പിച്ചു.
ഹലോ ഇംഗ്ലിഷ് എന്ന പേരില്‍ അറിയപ്പെട്ട ഈ പരിപാടി എട്ട് ദിവസം നീണ്ടുനിന്നു. ഒന്ന് മുതല്‍ ഏഴുവരെ ക്ലാസുകളില്‍ പഠിപ്പിക്കുന്ന അധ്യാപകര്‍ക്കാണ് കഴിഞ്ഞ വര്‍ഷം മുതല്‍ ആരംഭിച്ച ഇംഗ്ലിഷ് ട്രെയിനിംഗ് സംഘടിപ്പിച്ചത്. ഹലോ ഇംഗ്ലിഷ് ട്രൈനിങ്ങില്‍ പങ്കെടുക്കുന്ന അധ്യാപകര്‍ മറ്റു വിഷയങ്ങളില്‍ പങ്കെടുക്കേണ്ടതില്ലെന്ന് നേരത്തെ അറിയിച്ചിരുന്നു. പരിശീലനം കഴിഞ്ഞ് സ്‌കൂളുകളിലെത്തുന്ന ഓരോ ക്ലാസിലെയും അധ്യാപകര്‍ ലഭിച്ച അറിവുകള്‍ പരസ്പരം പങ്കുവെയ്ക്കണം.
ഓരോ ടേമിലും നല്‍കുന്ന ക്ലസ്റ്റര്‍ പരിശീലനവും അധ്യാപകര്‍ക്ക് നല്‍കുന്നുണ്ട്. ഭാഷ, ഗണിതം, സയന്‍സ്, ഐടി വിഷയങ്ങള്‍ക്കും രണ്ടുവീതം ദിവസങ്ങളിലായാണ് പരിശീലനം നല്‍കിയത്.