ലിയോണ്‍: യുവേഫ യൂറോപ്പ ലീഗ് കിരീടം സ്പാനിഷ് കരുത്തരായ അത്‌ലറ്റിക്കോ മാഡ്രിഡിന്. ഫൈനലില്‍ ഫ്രഞ്ച് ടീം ഒളിംപിക് മാഴ്‌സയെ മറുപടിയില്ലാത്ത മൂന്ന് ഗോളുകള്‍ക്ക് വീഴ്ത്തിയാണ് അത്‌ലറ്റിക്കോ കിരീടം സ്വന്തമാക്കിയത്. ഫ്രഞ്ച് താരം അന്റോയിന്‍ ഗ്രിസ്മാന്‍ ഇരട്ട ഗോളുകളുമായി ടീമിന്റെ വിജയത്തില്‍ നിര്‍ണായക പങ്ക് വഹിച്ചു. ശേഷിച്ച ഗോള്‍ ക്യാപ്റ്റന്‍ ഗാബിയും വലയിലാക്കി. മത്സരത്തിനിടെ മാഴ്‌സയുടെ ക്യാപ്റ്റന്‍ കൂടിയായ ദിമിത്രി പയറ്റ് ഗുരുതരമായ പരുക്കേറ്റ് പുറത്ത് പോയി. താരത്തിന്റെ ലോകകപ്പ് മോഹങ്ങളും ഇതോടെ ആശങ്കയിലായി.
കളി തുടങ്ങി 21ാം മിനുട്ടില്‍ ഗ്രിസ്മാന്‍ അത്‌ലറ്റിക്കോയെ മുന്നില്‍ കടത്തി. പിന്നീട് രണ്ടാം പകുതിയിലാണ് രണ്ട് ഗോളുകള്‍ കൂടി നേടി സ്പാനിഷ് ടീം ആധിപത്യം ഉറപ്പിച്ചത്. രണ്ടാം പകുതി തുടങ്ങി 49ാം മിനുട്ടില്‍ തന്റെ ഗോള്‍ നേട്ടം രണ്ടിലെത്തിച്ച് ഗ്രിസ്മാന്‍ ടീമിന്റെ ലീഡുയര്‍ത്തി. പിന്നീട് കളി തീരാന്‍ നിമിഷങ്ങള്‍ മാത്രമുള്ളപ്പോള്‍ ഗാബി പട്ടിക തികച്ചു.
മത്സരത്തില്‍ പന്ത് കൈവശം വച്ച് കളിക്കുന്നതിലും ആക്രമണം സംഘടിപ്പിക്കുന്നതിലും മാഴ്‌സ മുന്നില്‍ നിന്നു. എന്നാല്‍ അത്‌ലറ്റിക്കോ പതിവ് ശൈലിയില്‍ പ്രതിരോധം തീര്‍ത്ത് തക്കം കിട്ടുമ്പോള്‍ ആക്രമിക്കുകയെന്ന തന്ത്രം ഫലപ്രദമായി നടപ്പാക്കിയാണ് കിരീടത്തില്‍ മുത്തമിട്ടത്.
അത്‌ലറ്റിക്കോ നേടുന്ന മൂന്നാം യൂറോപ്പ ലീഗ് കിരീടമാണിത്. നേരത്തെ 2009-10, 11-12 വര്‍ഷങ്ങളിലും അവര്‍ കിരീടം നേടിയിരുന്നു. ഇരട്ട ഗോള്‍ നേടിയ അന്റോയിന്‍ ഗ്രിസ്മാന്‍ ഈ സീസണില്‍ ടീമിനായി 29 ഗോളുകള്‍ നേടി. ഗ്രിസ്മാനും ഫെര്‍ണാണ്ടോ ടോറസും അത്‌ലറ്റിക്കോ മാഡ്രിഡിനൊപ്പം സ്വന്തമാക്കുന്ന ആദ്യ മേജര്‍ കിരീടമെന്ന പ്രത്യേകതയും ഈ നേട്ടത്തിനുണ്ട്. കഴിഞ്ഞ ഏഴ് വര്‍ഷമായി അത്‌ലറ്റിക്കോയെ പരിശീലിപ്പിക്കുന്ന ഡീഗോ സിമിയോണി ടീമിനൊപ്പം നേടുന്ന രണ്ടാം യൂറോപ്പ ലീഗ് കിരീടമാണിത്.