കോഴിക്കോട്: സിറ്റി റോഡ് ഇംപ്രൂവ്‌മെന്റ് പദ്ധതിയില്‍ ഉള്‍പ്പെട്ട മാനാഞ്ചിറ-വെള്ളിമാട്കുന്ന് റോഡിന്റ പ്രധാന തടസങ്ങള്‍ നീങ്ങുന്നു. പദ്ധതിയില്‍പ്പെട്ട മറ്റു റോഡുകളെല്ലാം പൂര്‍ത്തിയായ ഘട്ടത്തിലും ഈ റോഡിന്റെ വികസനം വഴിമുട്ടി നില്‍ക്കുകയായിരുന്നു. സര്‍ക്കാര്‍ ഭൂമികളിലെ മരം മുറിച്ചുനീക്കുന്നതിനു കഴിഞ്ഞ ദിവസം തുടക്കം കുറിച്ചു.
ജില്ലാ മൃഗാശുപത്രി വളപ്പിലെ മരങ്ങളാണ് ഇന്നലെ മുറിച്ചുമാറ്റിയത്. ഡി.ഡി.ഇ ഓഫീസ്, നടക്കാവ് ടി.ടി.ഐ, ആര്‍.ഡി ഓഫിസ്, ലോ കോളജ് എന്നിവിടങ്ങളിലെ മരങ്ങള്‍ ഉടന്‍ മുറിച്ചുനീക്കും.
അതേസമയം കലക്ടറേറ്റ്, എ.ഡി.എം ബംഗ്ലാവ്, എന്‍.ജി.ഒ ക്വാര്‍ട്ടേഴ്‌സ് എന്നിവിടങ്ങളിലെ മരങ്ങള്‍ മുറിക്കുന്നതുമായി ബന്ധപ്പെട്ട നടപടിക്രമങ്ങള്‍ പുരോഗമിക്കുകയാണ്. റോഡിന്റെ വികസനത്തിന് ഭൂമി വിട്ടുനല്‍കിയവര്‍ക്കുള്ള നഷ്ടപരിഹാരം വിതരണം ചെയ്യുന്നതിന് മുന്നോടിയായുള്ള ഫൈനല്‍ ഡോക്യുമെന്റേഷന്‍ നടപടികള്‍ പുരോഗമിക്കുകയാണിപ്പോള്‍. റോഡിന് വിട്ടുനല്‍കിയ ഭൂമിയുടെ വിസ്തീര്‍ണം കൃത്യമായി തിട്ടപ്പെടുത്തുന്നത് ലാന്‍ഡ് അക്വിസിഷന്‍ തഹസില്‍ദാര്‍ ഉള്‍പ്പെടെയുള്ള റവന്യു ഉദ്യോഗസ്ഥരുടെ നേതൃത്വത്തിലാണ്.
ഭൂമി കൈമാറിയവര്‍ക്ക് നഷ്ടപരിഹാരം നല്‍കാന്‍ നൂറുകോടി രൂപ സര്‍ക്കാരിനോട് ആവശ്യപ്പെട്ടതായും തുക ലഭ്യമായാല്‍ ഒരാഴ്ചയ്ക്കകം വിതരണം ചെയ്യുമെന്നും റോഡ് പ്രൊജക്ട് കോഡിനേറ്റര്‍ കെ. ലേഖ പറഞ്ഞു. മലാപ്പറമ്പ് ജങ്ഷന്‍ വീതികൂട്ടുന്നതിനായി ഭൂമി വിട്ടുനല്‍കിയവര്‍ക്ക് രണ്ടുഘട്ടമായി 25 കോടി രൂപ വീതവും പിന്നീട് പത്തുകോടി രൂപയും ഉള്‍പ്പെടെ 60 കോടി രൂപ നേരത്തെ കൈമാറിയിരുന്നു. അന്നു റോഡ് ആക്ഷന്‍ കമ്മിറ്റിയുടെ ഇടപെടലിനെ തുടര്‍ന്ന് 380 പേര്‍ ഭൂമി വിട്ടുനല്‍കാന്‍ സമ്മതപത്രം കൈമാറിയിരുന്നു.
പിന്നീട് ഇതിലെ 280 പേര്‍ ഭൂമിയുടെ ആധാരവും കൈമാറി. ഭൂമിയുടെ രേഖകള്‍ കൈമാറിയവര്‍ക്ക് ഈ മാസം 31നകം തുക വിതരണം ചെയ്യുമെന്നാണ് സൂചന. ഇതു പൂര്‍ത്തിയായാല്‍ അവശേഷിക്കുന്നവരുടെ ലാന്‍ഡ് അക്വിസിഷന്‍ നടപടി പ്രകാരം സര്‍ക്കാര്‍ ഏറ്റെടുക്കും.