മക്ക: അടുത്ത വര്‍ഷം മുതല്‍ ഹജ്ജ് സമയത്തെ കുറഞ്ഞ സമയമൊഴികെ വര്‍ഷം മുഴുവനും ഉംറ വിസ നല്‍കാന്‍ സംവിധാനം ചെയ്യുന്നതായി ഹജ്ജ് ഉംറ മന്ത്രാലയ ഉന്നത ഉദ്യോഗസ്ഥന്‍ വെളിപ്പെടുത്തി. നിലവില്‍ എല്ലാ വര്‍ഷവും റംസാന്‍ പകുതിയായാല്‍ പിന്നെ ഉംറ വിസ താല്‍ക്കാലികമായി നിര്‍ത്തലാക്കുകയാണ് ചെയ്യുന്നത് .ഈ വര്‍ഷത്തെ ഉംറ സര്‍വ്വീസും റംസാന്‍ പകുതിയോടെ അധികൃതര്‍ താല്‍ക്കാലികമായി നിര്‍ത്തലാക്കിയിരുന്നു. ലോകത്തെ വിശ്വാസികള്‍ക്ക് വര്‍ഷം മുഴുവന്‍ വിശുദ്ധ മക്കയിലും മദീനയിലും എത്തിച്ചേരാന്‍ കഴിയുന്ന സംവിധാനം ഉണ്ടാക്കാനാണ് അധികൃതര്‍ ഒരുങ്ങുന്നത്.

നിലവിലെ ഉംറ സീസണ് വ്യത്യസ്തമായി വെറും ഹജ്ജ് സമയത്തെ ചുരുങ്ങിയ സമയം ഒഴിവാക്കി മറ്റു വര്‍ഷം മുഴുവനും ഉംറ വിസ നല്‍കുന്ന പദ്ധതിയാണ് ആസൂത്രണം ചെയ്യുന്നതെന്ന് ഹജ്ജ് ഉംറ നാഷണല്‍ കമ്മിറ്റി ഡെപ്യൂട്ടി ചെയര്‍മാന്‍ അബ്ദുള്ള അല്‍ അല്‍ ഖദി പറഞ്ഞു. അതായത് ശവ്വാല്‍ 10 മുതല്‍ മുഹറം 15 വരെയുള്ള സമയമൊഴികെ ബാക്കിയുള്ള മുഴുവന്‍ സമയത്തും ഉംറ വിസ ലഭ്യമാകുമെന്ന് അദ്ദേഹം പറഞ്ഞു. നിലവില്‍ റംസാന്‍ പകുതിയോടെ നിര്‍ത്തി വെക്കുന്ന ഉംറ വിസ സര്‍വ്വീസ് ഹജ്ജിനു ശേഷം മുഹര്‍റം അവസാനത്തോടെ മാത്രമാണ് വീണ്ടും പുനരാരംഭിക്കുന്നത്.
ഈ വര്‍ഷം സഊദി ഹജ്ജ് ഉംറ മന്ത്രാലയം ഉംറ വിസകള്‍ നല്‍കുന്നത് റംസാന്‍ പതിനഞ്ചു മുതല്‍ നിര്‍ത്തി വെച്ചെങ്കിലും ഉംറ വിസ റഫറന്‍സ് നമ്പര്‍ ലഭിച്ചവര്‍ക്ക് ലോകത്തിന്റെ വിവിധ ഭാഗങ്ങളിലുള്ള സഊദി ഡിപ്ലോമാറ്റിക് മിഷന്‍ ഉംറ വിസ വിതരണം ചെയ്യുമെന്ന് അദ്ദേഹം വ്യക്തമാക്കി.
ഈ വര്‍ഷം ഏറ്റവും കൂടുതല്‍ ഉംറ തീര്‍ത്ഥാടകരെ സ്വീകരിച്ച വര്‍ഷമാണെകിലും മന്ത്രാലയം പ്രതീക്ഷിച്തിനേക്കാളും എത്രയോ താഴെയാണിത്. ഈ വര്‍ഷം എട്ടു മില്യണ്‍ തീര്‍ത്ഥാടകരെയാണ് മന്ത്രാലയം പ്രതീക്ഷിച്ചത്. എന്നാല്‍ 6.4 മില്യണ്‍ തീര്‍ത്ഥാടകരാണ് രാജ്യത്തെത്തിയത് അദ്ദേഹം പറഞ്ഞു. വിഷന്‍ 2030 യുടെ ചുവടു പിടിച്ചു നീങ്ങുന്ന ദേശീയ പരിവര്‍ത്തന പദ്ധതി 2020 ന്റെ ഭാഗമായി 2020 ല്‍ 200 ബില്യണ്‍ സഊദി റിയാല്‍ വരുമാനമാണ് വിദേശ തീര്‍ത്ഥാടകാരില്‍ നിന്നും രാജ്യത്തിനകത്തും നിന്നും പ്രതീക്ഷിക്കുന്നത്