കൊച്ചി: സ്കൂളുകളിൽ കുട്ടികളുടെ സുരക്ഷ ഉറപ്പുവരുത്തുന്നതിനായി ഏഴ് മാർഗ നിർദേശങ്ങൾ പുറപ്പെടുവിച്ചതായി സർക്കാർ ഹൈക്കോടതിയിൽ അറിയിച്ചു. 2019ൽ വയനാട് സുൽത്താൻ ബത്തേരിയിലെ സർക്കാർ സ്കൂളിൽ ക്ലാസ് മുറിയിൽ വിദ്യാർത്ഥി പാമ്പ് കടിയേറ്റ് മരിച്ച സംഭവത്തിന്റെ പശ്ചാത്തലത്തിൽ അഡ്വക്കേറ്റ് കുളത്തൂർ ജയ്‌സിംഗ് ഫയൽ ചെയ്ത ഹരജിയിലാണ് സർക്കാർ ഇക്കാര്യം അറിയിച്ചത്. പൊതുവിദ്യാഭ്യാസ അഡീഷണൽ ഡയറക്ടർ ഇറക്കിയ സർക്കുലർ ആണ് ഹാജരാക്കിയത്. 

സ്കൂളുകളിലെ ശൗചാലയങ്ങളിൽ വൃത്തി, വെള്ളം, വെളിച്ചം എന്നിവ ഉറപ്പാക്കണം, സ്കൂളുകളിൽ പ്രഥമശുശ്രൂഷ കിറ്റ് വേണം, പ്രഥമശുശ്രൂഷയിൽ രണ്ട് ജീവനക്കാർക്ക് അടിസ്ഥാന പരിശീലനം നൽകണം, പാമ്പുകളെ ഒഴിവാക്കാനായി വനംവകുപ്പുമായി ഏകോപനം, സ്കൂളുകളിലും പരിസരങ്ങളിലും പരിശോധന നടത്തണം, തീപിടുത്തം വെള്ളപൊക്കം പോലുള്ള ദുരന്ത നിവാരണ അതോറിറ്റി, തദ്ദേശ സ്ഥാപനം എന്നിവയുമായി ചേർന്നുകൊണ്ട് മോക്ക് ഡ്രിൽ നടത്തണം, നിർദേശങ്ങൾ കൃത്യമായി പാലിക്കുന്നുണ്ടെന്ന് സ്കൂൾ അധികൃതരും മാനേജ്‌മെന്റും ഉറപ്പാക്കണം, ജില്ലാ വിദ്യാഭ്യാസ അധികൃതർ ഇടയ്ക്കിടെ പരിശോധന നടത്തണം, അടിയന്തരമായി മെഡിക്കൽ സാഹചര്യനാണ് നേരിടാനായി ചൈൽഡ് എമർജൻസി മെഡിക്കൽ റെസ്പോൺസ് പ്ലാൻ തയ്യാറാക്കുകയും ആന്റിവെനം, പീഡിയാട്രിക് മെഡിക്കൽ കെയർ തുടങ്ങിയവ ലഭ്യമാക്കാൻ അടുത്തുള്ള ആശുപത്രിയുമായി ഏകോപനം നടത്തണം ഇത്രയും കാര്യങ്ങളാണ് സ്കൂളുകളിൽ കുട്ടികളുടെ സുരക്ഷ ഉറപ്പുവരുത്തുന്നതിനായി പുറപ്പെടുവിച്ച മാർഗനിർദേശങ്ങൾ.

Government issues seven guidelines to ensure child safety in schools