ആലക്കോട്: അന്ധമായ കോണ്‍ഗ്രസ് വിരോധം മൂലമാണ് കമ്മ്യൂണിസ്റ്റ് പാര്‍ട്ടി ഇന്ത്യയില്‍ കുത്തോട്ട് വളരുന്നതെന്ന് കോണ്‍ഗ്രസ് വക്താവ് രാജ്‌മോഹന്‍ ഉണ്ണിത്താന്‍. തളിപ്പറമ്പ് മണ്ഡലം യൂത്ത് കോണ്‍ഗ്രസ് ജാഥയുടെ സമാപന സമ്മേളനം എരുവാട്ടിയില്‍ ഉദ്ഘാടനം ചെയ്യുകയായിരുന്നു അദ്ദേഹം. കേവലം രണ്ടു സീറ്റ് മാത്രമുണ്ടായിരുന്ന ബി.ജെ.പിക്ക് മൂന്നില്‍ രണ്ടു ഭൂരിപക്ഷം നേടിയെടുക്കാന്‍ സഹായിച്ചത് കമ്മ്യൂണിസ്റ്റ് പാര്‍ട്ടികളാണ്. കോണ്‍ഗ്രസിനെ തളക്കാന്‍ ഏതു ചെകുത്താനെയും കൂട്ടുപിടിക്കുക എന്നതായിരുന്നു അവര്‍ സ്വീകരിച്ച നിലപാട് എന്നും ഉണ്ണിത്താന്‍ കുറ്റപ്പെടുത്തി. യൂത്ത് കോണ്‍ഗ്രസ് മണ്ഡലം പ്രസിഡന്റ് രാഹുല്‍ ദാമോദരന്‍ അധ്യക്ഷനായി. ഡി.സി.സി ജനറല്‍ സെക്രട്ടറി മനോജ് കൂവേരി, ചപ്പാരപ്പടവ് പഞ്ചായത്ത് പ്രസിഡന്റ് പി.ജെ മാത്യു, ജില്ലാ പഞ്ചായത്ത് മെമ്പര്‍ സുമിത്ര ഭാസ്‌കരന്‍, സജി ഓതറ, ജിത്തു തോമസ് സംസാരിച്ചു.