കൊട്ടിയൂര്‍: കൊട്ടിയൂര്‍ ചപ്പമലയില്‍ പുലി ഇറങ്ങിയതായി ആഭ്യൂഹം. ചപ്പമലയിലെ പുത്തന്‍പറമ്പില്‍ തങ്കച്ചന്റെ വളര്‍ത്തുനായയെ കഴിഞ്ഞദിവസം കാണാതായതോടെയാണ് പുലി ഇറങ്ങിയതായുള്ള ആഭ്യൂഹമുണ്ടായത്. വ്യാഴാഴ്ച രാത്രി മുതലാണ് തങ്കച്ചന്റെ വീട്ടുമുറ്റത്ത് കെട്ടിയിരുന്ന പട്ടിയെ കാണാതായത്. വെള്ളിയാഴ്ച രാത്രി ഏഴോടെ ഫോണ്‍ ചെയ്യുന്നതിനിടെ സമീപത്തെ സ്വകാര്യ വ്യക്തിയുടെ റബര്‍ തോട്ടത്തില്‍ പുലി നില്‍ക്കുന്നതായി കണ്ടെന്ന് തങ്കച്ചന്‍ പറയുന്നു. എന്നാല്‍ പുലിയുടെ കാല്‍പാടുകളും മറ്റും കാണാത്തതിനാല്‍ വനം വകുപ്പിന് സ്ഥിരീകരിക്കാന്‍ കഴിഞ്ഞിട്ടില്ല. പട്ടിക്കടുവ ആയിരിക്കാനാണ് സാദ്ധ്യതയെന്നാണ് വനം വകുപ്പ് അധികൃതര്‍ പറയുന്നു. എന്നാല്‍ ഏതാനും വര്‍ഷം മുമ്പ് കൊട്ടിയൂര്‍ മേഖലയില്‍ സ്വകാര്യ വ്യക്തിയുടെ കിണറ്റില്‍ പുലി വീണ് ചത്തത് അടക്കമുള്ള സംഭവങ്ങള്‍ ഉണ്ടായിരുന്നതു കൊണ്ട് പുലിയില്ലെന്ന് വിശ്വസിക്കാനും നാട്ടുകാര്‍ക്ക് കഴിയുന്നില്ല. പുലിയെ കണ്ടെന്ന അഭ്യൂഹം പരന്നതോടെ നാട്ടുകാര്‍ ഭീതിയിലായി.