ശ്രീനഗര്‍: കത്‌വയില്‍ എട്ട് വയസുകാരിയെ ക്രൂരബലാത്സംഗത്തിനിരയാക്കി കൊലപ്പെടുത്തിയ കേസില്‍ നിന്ന് രക്ഷപ്പെടാന്‍ പ്രതികളിലൊരാള്‍ വ്യാജ തെളിവുണ്ടാക്കിയതായി ഫോറന്‍സിക് പരിശോധനയില്‍ തെളിഞ്ഞു. പ്രതികളില്‍ ഒരാളായ വിശാല്‍ ജംഗോത്രയാണ് കുറ്റകൃത്യം നടക്കുന്ന സമയത്ത് സ്ഥലത്തില്ലെന്ന് വരുത്തിത്തീര്‍ക്കാന്‍ വ്യാജരേഖയുണ്ടാക്കാന്‍ ശ്രമിച്ചതെന്ന് ക്രൈംബ്രാഞ്ച് പറഞ്ഞു.
പെണ്‍കുട്ടി പീഡിപ്പിക്കപ്പെടുമ്പോള്‍ താന്‍ മീററ്റിലെ കോളജില്‍ നിന്ന് പരീക്ഷ എഴുതുകയായിരുന്നുവെന്ന് തെളിയിക്കാനാണ് വിശാല്‍ ശ്രമിച്ചത്.
എന്നാല്‍ കോടതിയില്‍ സമര്‍പ്പിച്ച രേഖയിലെ ഒപ്പ് വിശാലിന്റെതല്ലെന്ന് ഫോറന്‍സിക് ലാബില്‍ നടത്തിയ പരിശോധനയില്‍ വ്യക്തമാവുകയായിരുന്നു. സഹപാഠികളിലാരോ വ്യാജ ഒപ്പ് രേഖപ്പെടുത്തിയെന്നാണ് ക്രൈംബ്രാഞ്ച് അന്വേഷണ സംഘം കരുതുന്നത്. ഇതുമായി ബന്ധപ്പെട്ട് വിശാലിന്റെ മൂന്ന് സുഹൃത്തുക്കളോട് അന്വേഷണ സംഘത്തിന് മുന്നില്‍ ഹാജരാവാന്‍ നിര്‍ദ്ദേശിച്ചിട്ടുണ്ട്. രണ്ട് പൊലിസുകാര്‍ ഉള്‍പ്പടെ എട്ട് പ്രതികളാണ് കേസില്‍ അറസ്റ്റിലായത്.
ഇക്കഴിഞ്ഞ ജനുവരി 10നായിരുന്നു എട്ടുവയസുകാരി പെണ്‍കുട്ടിയെ തട്ടിക്കൊണ്ടുപോയി ക്രൂരബലാത്സംഘം ചെയ്ത് കൊന്നത്. രാജ്യവ്യാപകമായ പ്രതിഷേധങ്ങളാണ് സംഭവം ഉണ്ടാക്കിയത്.