പാലക്കാട്: ജലദിനത്തോടനുബന്ധിച്ച് ജില്ലാ സാക്ഷരതമിഷന്‍ ജില്ലയിലെ 186 സാക്ഷരതാമിഷന്റെ വിദ്യാകേന്ദ്രങ്ങളില്‍ ജലസംരക്ഷണ പരിപാടികളും പ്രവര്‍ത്തനങ്ങളും നടത്തുമെന്ന് ജില്ലാ കോഡിനേറ്റര്‍ അറിയിച്ചു. ബോധവത്കരണ ക്ലാസുകള്‍ക്കൊപ്പം ജലസംരക്ഷണ പ്രതിജ്ഞ, ജലസ്രോതസുകളുടെ പുനരുജീവനവും സംരക്ഷണവും, പുഴകളുടെയും തോടുകളുടെയും ശുചീകരണം തുടങ്ങിയ പ്രവര്‍ത്തനങ്ങളാണ് നടപ്പാക്കുക. പ്ലാച്ചിമടയില്‍ സാക്ഷരതാമിഷന്റെ തുടര്‍ വിദ്യാകേന്ദ്രത്തിന്റെ ആഭിമുഖ്യത്തില്‍ ജലസംരക്ഷണ കര്‍മപദ്ധതി നടപ്പാക്കും. മണ്ണാര്‍ക്കാട് പുഴയോരത്ത് കുട്ടികളുടെ ജലസംരക്ഷണ കൂട്ടായ്മ നടത്തും. കൂടാതെ പട്ടാമ്പിയിലെ ഭാരതപുഴയോരത്തും പരിപാടികള്‍ സംഘടിപ്പിക്കും. പൊതുജനപങ്കാളിത്തം ഉറപ്പാക്കിയുള്ള ജലസംരക്ഷണ പ്രവര്‍ത്തനങ്ങളാണ് ലക്ഷ്യമിടുന്നതെന്ന് ജില്ലാ കോഡിനേറ്റര്‍ അറിയിച്ചു.