പൂനെ: നിര്‍ണായക പോരാട്ടത്തില്‍ ചെന്നൈ സൂപ്പര്‍ കിങ്‌സിനോട് പരാജയപ്പെട്ട് കിങ്‌സ് ഇലവന്‍ പഞ്ചാബിന്റെ പ്ലേ ഓഫ് സ്വപ്നങ്ങള്‍ അവസാനിച്ചു. അഞ്ച് വിക്കറ്റിനാണ് ചെന്നൈ വിജയിച്ചത്. ആദ്യം ബാറ്റ് ചെയ്ത പഞ്ചാബ് 19.4 ഓവറില്‍ 153 റണ്‍സില്‍ പുറത്തായി. ചെന്നൈ 19.1 ഓവറില്‍ അഞ്ച് വിക്കറ്റ് നഷ്ടത്തില്‍ 159 റണ്‍സെടുത്ത് വിജയിച്ചു. റെയ്‌ന പുറത്താകാതെ 49 പന്തില്‍ അടിച്ചെടുത്ത 61 റണ്‍സിന്റെ ബലത്തിലാണ് ചെന്നൈ വിജയിച്ചത്. ദീപക് ചഹര്‍ 20 പന്തില്‍ 39 റണ്‍സെടുത്തു. ക്യാപ്റ്റന്‍ ധോണി ഏഴ് പന്തില്‍ 16 റണ്‍സുമായി പുറത്താകാതെ നിന്നു.
പഞ്ചാബിനായി 26 പന്തില്‍ 54 റണ്‍സെടുത്ത കരുണ്‍ നായരാണ് ടോപ് സ്‌കോറര്‍. മനോജ് തിവാരി 35 റണ്‍സും ഡേവിഡ് മില്ലര്‍ 24 റണ്‍സും കണ്ടെത്തി. കരുണ്‍ അഞ്ച് സിക്‌സും മൂന്ന് ഫോറും പറത്തി. നാലോവറില്‍ വെറും പത്ത് റണ്‍സ് മാത്രം വഴങ്ങി നാല് വിക്കറ്റെടുത്ത ലുന്‍ഗി എന്‍ഗിഡിയുടെ മാരക ബൗളിങാണ് പഞ്ചാബിന്റെ അടി തെറ്റിച്ചത്. ബ്രാവോ, ശാര്‍ദുല്‍ താക്കൂര്‍ എന്നിവര്‍ രണ്ട് വീതം വിക്കറ്റുകള്‍ വീഴ്ത്തി.