മക്ക: അടുത്ത വര്‍ഷം മുതല്‍ ഹജ്ജ് സമയത്തെ കുറഞ്ഞ സമയമൊഴികെ വര്‍ഷം മുഴുവനും ഉംറ വിസ നല്‍കാന്‍ സംവിധാനമൊരുക്കുന്നതായി ഹജ്ജ്, ഉംറ മന്ത്രാലയ ഉദ്യോഗസ്ഥന്‍ വെളിപ്പെടുത്തി. നിലവില്‍ എല്ലാ വര്‍ഷവും റമദാന്‍ പകുതിയായാല്‍ ഉംറ വിസകള്‍ താല്‍ക്കാലികമായി നിര്‍ത്തലാക്കാറാണ് പതിവ്.ഈ വര്‍ഷത്തെ ഉംറ സര്‍വിസും റമദാന്‍ പകുതിയോടെ താല്‍ക്കാലികമായി നിര്‍ത്തിയിരുന്നു. നിലവിലെ ഉംറ സീസണ് വ്യത്യസ്തമായി ഹജ്ജ് സമയത്തെ ചുരുങ്ങിയ സമയം മാത്രം ഒഴിവാക്കി ഉംറ വിസ നല്‍കുന്ന പദ്ധതിയാണ് ആസൂത്രണം ചെയ്യുന്നതെന്നു ഹജ്ജ്, ഉംറ നാഷനല്‍ കമ്മിറ്റി ഡെപ്യൂട്ടി ചെയര്‍മാന്‍ അബ്ദുള്ള അല്‍ അല്‍ ഖദി പറഞ്ഞു. ഇതനുസരിച്ചു ശവ്വാല്‍ 10 മുതല്‍ മുഹര്‍റം 15 വരെയുള്ള സമയമൊഴികെ ബാക്കിയുള്ള മുഴുവന്‍ സമയത്തും ഉംറ വിസ ലഭ്യമാകും. ഈ വര്‍ഷം ഉംറ വിസകള്‍ നല്‍കുന്നത് റമദാന്‍ പതിനഞ്ചു മുതല്‍ നിര്‍ത്തിവച്ചെങ്കിലും ഉംറ വിസ റഫറന്‍സ് നമ്പര്‍ ലഭിച്ചവര്‍ക്കു സഊദി ഡിപ്ലോമാറ്റിക് മിഷന്‍ ഉംറ വിസ വിതരണം ചെയ്യുമെന്നും അദ്ദേഹം വ്യക്തമാക്കി. ഈ വര്‍ഷം എട്ടു മില്യണ്‍ തീര്‍ഥാടകരെയാണ് മന്ത്രാലയം പ്രതീക്ഷിച്ചത്. എന്നാല്‍ 6.4 മില്യണ്‍ തീര്‍ഥാടകര്‍ മാത്രമാണ് രാജ്യത്തെത്തിയതെന്നും അദ്ദേഹം പറഞ്ഞു.