ന്യൂഡല്‍ഹി: നഴ്‌സുമാരുടെ ശമ്പള പരിഷ്‌കരണം സംബന്ധിച്ച് സംസ്ഥാന സര്‍ക്കാര്‍ പുറപ്പെടുവിച്ച വിജ്ഞാപനം സ്റ്റേ ചെയ്യണമെന്നാവശ്യപ്പെട്ട് സ്വകാര്യ ആശുപത്രി മാനേജ്‌മെന്റുകള്‍ നല്‍കിയ ഹരജി സുപ്രിംകോടതി തള്ളി. ഹരജിയില്‍ ഒരു മാസത്തിനകം തീര്‍പ്പുണ്ടാക്കണമെന്നു ഹൈക്കോടതിക്കു നിര്‍ദേശം നല്‍കിയാണ് ജസ്റ്റിസ് എ.എം ഖാന്‍വില്‍ക്കറും നവീന്‍ സിന്‍ഹയും അടങ്ങുന്ന അവധിക്കാല ബെഞ്ചിന്റെ നടപടി. സ്വകാര്യ ആശുപത്രികളിലെ നഴ്‌സുമാര്‍ അടക്കമുള്ള ജീവനക്കാര്‍ക്ക് മിനിമം വേതനം ഉറപ്പാക്കി സര്‍ക്കാര്‍ ഇറക്കിയ വിജ്ഞാപനം ചോദ്യംചെയ്തുകൊണ്ടാണ് 960 ഓളം ആശുപത്രികളുടെ കൂട്ടായ്മയായ കേരളാ പ്രൈവറ്റ് ഹോസ്പിറ്റല്‍സ് അസോസിയേഷന്‍ ഹരജി നല്‍കിയത്. ഇതേ ആവശ്യം നേരത്തെ ഹൈക്കോടതിയും തള്ളിയതോടെയാണ് മാനേജ്‌മെന്റുകള്‍ സുപ്രിംകോടതിയെ സമീപിച്ചത്.
വേതനം നിശ്ചയിക്കാന്‍ സമിതിക്ക് രൂപം നല്‍കിയതില്‍ ചട്ടലംഘനമുണ്ടെന്ന് ഇന്നലെ അസോസിയേഷന് വേണ്ടി ഹാജരായ മുതിര്‍ന്ന അഭിഭാഷകന്‍ അഭിഷേക് സിങ്‌വി വാദിച്ചു. സമിതിക്കുള്ളില്‍ തന്നെ മിനിമം വേതനം സംബന്ധിച്ച് സമവായമുണ്ടായിരുന്നില്ല.
അന്തിമ വിധി അനുകൂലമായാല്‍ നല്‍കിയ ശമ്പളം തിരിച്ചു പിടിക്കാന്‍ കഴിയില്ലെന്നും മാനേജ്‌മെന്റുകള്‍ ചൂണ്ടിക്കാട്ടി. എന്നാല്‍ കേസ് അടുത്തമാസം നാലിന് ഹൈക്കോടതി സിംഗിള്‍ ബെഞ്ച് പരിഗണിക്കാന്‍ നിശ്ചയിച്ചതിനാല്‍ സുപ്രിംകോടതി ഇടപെടരുതെന്നു സംസ്ഥാന സര്‍ക്കാരിന് വേണ്ടി ഹാജരായ മുന്‍ സോളിസിറ്റര്‍ ജനറല്‍ രഞ്ജിത്ത് കുമാര്‍ ആവശ്യപ്പെട്ടു.
മിനിമം വേതനം നിശ്ചയിക്കണമെന്നു സുപ്രിംകോടതി തന്നെ ഉത്തരവിട്ട കാര്യം യുനൈറ്റഡ് നഴ്‌സസ് അസോസിയേഷനും (യു.എന്‍.എ) ചൂണ്ടിക്കാട്ടി. തുടര്‍ന്നാണ് മാനേജ്‌മെന്റുകളുടെ സ്റ്റേ ആവശ്യം കോടതി തള്ളിയത്.