കുന്ദമംഗലം: സ്‌കൂളുകള്‍, കോളേജ് എന്നിവ കേന്ദ്രീകരിച്ച് വിദ്യാര്‍ഥികള്‍ക്കിടിയില്‍ കഞ്ചാവ് വില്‍പ്പന നടത്തുന്നയാളെ കുന്ദമംഗലം എസ്.ഐ വിമലും ഷാഡോ പൊലിസും ചേര്‍ന്നു പിടികൂടി. കൊടുവള്ളി വാവാട് സ്വദേശി കപ്പലാംകുഴിയില്‍ അബ്ദുല്‍ ബഷീര്‍ എന്ന കൊള്ളമുട്ട ബഷീറാണ് 250 ഗ്രാം കഞ്ചാവുമായി പൊലിസിന്റെ പിടിയിലായത്.
ചേവായൂര്‍ സി.ഐ എ.വി ജോണിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ കാരന്തൂര്‍ ഒവുങ്ങര ബസ് സ്റ്റോപ്പിന് സമീപത്തു വച്ചാണ് ഇയാളെ പിടികൂടിയത്.പ്രതിക്കെതിരേ കോഴിക്കോട്, വയനാട് ജില്ലകളിലായി നിരവധി കഞ്ചാവ് കേസ് നിലവിലുണ്ട്. ഇയാള്‍ വയനാട്ടില്‍ നിന്നും ഇടുക്കിയില്‍ നിന്നും മൊത്തമായി കഞ്ചാവ് എത്തിച്ച് വില്‍പ്പന നടത്തുന്നയാളാണ്. ഇയാളുടെ കൂട്ടാളികളെക്കുറിച്ച് പൊലിസിന് വിവരം ലഭിച്ചിട്ടുണ്ട്.
ഷാഡോ പൊലിസ് അംഗങ്ങളായ മുഹമ്മദ് ഷാഫി, സജി, അഖിലേഷ്, സുനില്‍ കുമാര്‍, ആഷിഖ് എന്നിവര്‍ അടങ്ങിയ സംഘമാണ് പ്രതിയെ വലയിലാക്കിയത്.