കോഴിക്കോട്: പ്രായപൂര്‍ത്തിയാവാത്ത ദലിത് വിദ്യാര്‍ഥിയെ മെഡിക്കല്‍ കോളജ് എസ്.ഐ മര്‍ദിച്ച സംഭവത്തില്‍ ആക്ഷന്‍ കമ്മിറ്റി വീണ്ടും സമരത്തിനൊരുങ്ങുന്നു.
അക്രമം നടത്തിയ എസ്.ഐക്കെതിരേ നടപടി സ്വീകരിക്കുമെന്ന ഉന്നത പൊലിസ് ഉദ്യോഗസ്ഥരുടെ ഉറപ്പ് ഏഴു മാസമായിട്ടും പാലിക്കപ്പെടാത്ത സാഹചര്യത്തിലാണ് ബന്ധുക്കളും ആക്ഷന്‍കമ്മിറ്റിയും ചേര്‍ന്ന് രണ്ടാം ഘട്ട സമരത്തിന് ഒരുങ്ങുന്നത്.
എസ്.ഐ ഹബീബുല്ലയുടെ മര്‍ദനമേറ്റ അജയിന്റെ മാതാവ് ടി.വി സുലേചന രണ്ടാം ഘട്ടസമരത്തിന്റെ തുടക്കമെന്ന നിലയില്‍ 25ന് രാവിലെ 10 മുതല്‍ വൈകീട്ട് 5വരെ സൂചനാ നിരാഹാര സമരം നടത്തും. അജയിന് മര്‍ദനമേറ്റ സമയത്ത് മെഡിക്കല്‍ കോളജ് എസ്.ഐയെ വെള്ളപൂശാനാണ് ഉന്നത പോലിസ് ഉദ്യോഗസ്ഥര്‍ ആദ്യം ശ്രമിച്ചിരുന്നത്. ഇതിനെതിരേ വിദ്യാര്‍ഥിയുടെ മാതാവ് ഉള്‍പ്പെടെയുള്ള ബന്ധുക്കള്‍ അനിശ്ചിതകാല സമരം ആരംഭിച്ചിരുന്നു. ഇതിന്റെ അടിസ്ഥാനത്തില്‍ നടന്ന ചര്‍ച്ചയില്‍ ഇക്കാര്യത്തില്‍ 20 ദിവസംകൊണ്ട് അന്വേഷണം പൂര്‍ത്തിയാക്കി എസ്.ഐക്കെതിരെ നടപടി സ്വീകരിക്കുമെന്ന് സിറ്റി പൊലിസ് കമ്മിഷണര്‍ ഉറപ്പു നല്‍കിയിരുന്നു.
എന്നാല്‍, എസ്.ഐക്കെതിരേ ഇതുവരെ നടപടി സ്വീകരിക്കാതിരുന്ന പൊലിസ്, ആക്ഷന്‍ കമ്മിറ്റി ഭാരവാഹികള്‍ക്കെതിരെ രണ്ട് കേസുകള്‍ എടുക്കുകയായിരുന്നു. 25ന് കിഴക്കേ നടക്കാവിലാണ് സുലോചനയുടെ നിരാഹാര സമരം നടക്കുക. സാമൂഹിക പ്രവര്‍ത്തകരും അനുഭാവ സത്യാഗ്രഹം നടത്തും. അധികൃതരില്‍ നിന്ന് അനുകൂല നടപടി ഉണ്ടാവുന്നില്ലെങ്കില്‍ അനിശ്ചിതകാല സമരം ആരംഭിക്കുമെന്നും ആക്ഷന്‍ കമ്മിറ്റി ഭാരവാഹികള്‍ അറിയിച്ചു.