മൂവാറ്റുപുഴ: അസിസ്റ്റന്റ് എന്‍ജിനീയര്‍ അപമര്യാദയായി പെരുമാറി എന്നാരോപിച്ച് കല്ലൂര്‍ക്കാട്ടു കെ.എസ്.ഇ.ബി ഓഫിസില്‍ കുടുംബാംഗങ്ങള്‍ രാത്രിയില്‍ കുത്തിയിരിപ്പു സമരം നടത്തി. വൈദ്യുതി ചാര്‍ജ് അടച്ചിട്ടും കണക്ഷന്‍ പുനസ്ഥാപിക്കാത്തതിനെ തുടര്‍ന്നുണ്ടായ തര്‍ക്കത്തെ തുടര്‍ന്നാണ് വാഴക്കുളം വടവുകോട് നിവാസികളായ സജയ്കുമാര്‍ സരതി ദമ്പതികളും മൂന്നു കുട്ടികളും കല്ലൂര്‍ക്കാട് കെ.എസ്.ഇ.ബി ഓഫിസിനുള്ളില്‍ കുത്തിയിരിപ്പ് സമരം നടത്തിയത്. വിവരമറിഞ്ഞെത്തിയ നാട്ടുകാരും കുടുംബാംഗങ്ങള്‍ക്കു പിന്തുണയായി ഉപരോധ സമരത്തില്‍ പങ്കുചേര്‍ന്നു. കല്ലൂര്‍ക്കാട് സ്റ്റേഷനില്‍ നിന്നും എസ്.ഐ മീരാന്‍കുഞ്ഞിന്റെ നേതൃത്വത്തിലുള്ള പൊലിസ് സംഘം സമരക്കാരെ അനുനയിപ്പിക്കാന്‍ ശ്രമിച്ചെങ്കിലും ഫലമുണ്ടായില്ല.
ശേഷം പൊലിസിന്റെ നിര്‍ദേശ പ്രകാരം ഓഫിസിലെത്തിയ കെ.എസ്.ഇ.ബി മൂവാറ്റുപുഴ അസിസ്റ്റന്റ് എക്‌സിക്യൂട്ടിവ് എന്‍ജിനീയര്‍ സന്തോഷ് പി അബ്രാഹം കുറ്റാരോപിതനായ ഉദ്യോഗസ്ഥനെതിരേ നടപടിയെടുക്കുമെന്നും വിച്ഛേദിച്ച കണക്ഷന്‍ ഉടനടി പുനസ്ഥാപിച്ചു നല്‍കുമെന്നും ഉറപ്പു നല്‍കിയതിനെ തുടര്‍ന്നാണ് രാത്രി പതിനൊന്നു മണിയോടെ കുടുംബാംഗംങ്ങള്‍ സമരം അവസാനിപ്പിച്ചത്.