തൃക്കരിപ്പൂര്‍: മഹാവിഷ്ണു ക്ഷേത്രങ്ങളില്‍ പൗരാണികവും പരശുരാമനാല്‍ പ്രതിഷ്ഠിതമെന്നും കരുതുന്ന തൃക്കരിപ്പൂര്‍ ചക്രപാണി ക്ഷേത്രത്തില്‍ ഉത്സവാഘോഷം 25 മുതല്‍ ഏപ്രില്‍ ഒന്നു വരെ നടക്കും. മീനമാസത്തിലെ രോഹിണി നക്ഷത്രത്തിലെ ആറാട്ടുത്സവമാണു പ്രാധാന്യമായി കണക്കാക്കുന്നത്. ബ്രഹ്മാണ്ഡ പുരാണത്തിലെ 21ാമത് അധ്യായത്തില്‍ പ്രത്യേകം പരാമര്‍ശിക്കപ്പെടുന്ന ചക്രപാണി പ്രതിഷ്ഠയും താമരക്കുളവും തൃക്കരിപ്പൂരിലെ ആദ്ധ്യാത്മിക ചൈതന്യത്തിന്റെ പ്രഭവ കേന്ദ്രമാണെന്ന് ആഘോഷ കമ്മിറ്റി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. ഇന്നു രാത്രി ഏഴിനു ക്ഷേത്രം തന്ത്രി തെക്കിനിയേടത്ത് തരണനല്ലൂര്‍ പത്മനാഭന്‍ ഉണ്ണി നമ്പൂതിരിപ്പാടിന്റെ മുഖ്യ കാര്‍മികത്വത്തില്‍ ഉത്സവത്തിന് കൊടിയേറ്റും. തുടര്‍ന്ന് എട്ടുനാള്‍ ക്ഷേത്രത്തില്‍ താന്ത്രീക കര്‍മങ്ങളും വാദ്യമേളങ്ങളോടെയുള്ള ആനപ്പുറത്ത് എഴുന്നളളിപ്പും തിടമ്പ് നൃത്തവും നടക്കും. ഇത്തവണ ആനപ്പുറത്ത് എഴുന്നള്ളിപ്പും തിടമ്പ് നൃത്തവും വൈകുന്നേരങ്ങളില്‍ ആയിരിക്കുമെന്ന പ്രത്യേകതയും ഉണ്ട്.
26ന് രാത്രി 8.30ന് കോഴിക്കോട് രംഗഭാഷയുടെ 'കുടുംബനാഥന്റെ ശ്രദ്ധക്ക്' നാടകവും 27ന് രാത്രി 8.30നു ശ്രുതി ബി ചന്ദ്രനും സംഘവും 'നൃത്ത സംഗീത സമന്വയം' അവതരിപ്പിക്കും. 28നു രാവിലെ ഉത്സവ ബലി നടക്കും. രാത്രി 8.30നു കലോത്സവ വേദികളില്‍ കഴിവ് തെളിയിച്ച കലാകാരന്മാര്‍ അണിനിരക്കുന്ന പ്രതിഭാ സംഗമം. 29ന് രാത്രി 8.30ന് സിനിമ പിന്നണി ഗായകന്‍ എടപ്പാള്‍ വിശ്വന്‍ നയിക്കുന്ന പയ്യന്നൂര്‍ സ്വരരാഗ് ഓര്‍ക്കസ്ട്രയുടെ ഗാനിശ അരങ്ങേറും. 30ന് വൈകുന്നേരം മൂന്നിന് പുലിയന്നൂര്‍ പടിക്കാല്‍ ഭഗവതി ക്ഷേത്രത്തില്‍ നിന്നുള്ള കാഴ്ചയും 4.15ന് തായമ്പകയും 5.30ന് ആനപ്പുറത്തെഴുന്നള്ളത്തും തിടമ്പ് നൃത്തവും നടക്കും. രാത്രി ഏഴിന് ഇളമ്പച്ചി തിരുവമ്പാടി ക്ഷേത്രത്തിലേക്കുളള എഴുന്നള്ളത്ത്. 31ന് വൈകുന്നേരം തിടമ്പ് നൃത്തത്തിന് ശേഷം പള്ളിവേട്ടയും പള്ളിക്കുറുപ്പും നടക്കും. ഏപ്രില്‍ ഒന്നിന് രാവിലെ പള്ളി ഉണര്‍ത്തലും ദേവനെ കണികാണലും ആറാട്ടുബലിക്കും ശേഷമാണ് കൊടിയിറക്കല്‍ നടക്കുക. ആറാട്ടു സദ്യയോടെ എട്ടുനാള്‍ നീണ്ട ഉത്സവാഘോഷത്തിനു സമാപനമാകും. വാര്‍ത്താ സമ്മേളനത്തില്‍ ഉത്സവാഘോഷ കമ്മിറ്റി ചെയര്‍മാന്‍ അഡ്വ.കെ.കെ രാജേന്ദ്രന്‍, ജനറല്‍ കണ്‍വീനര്‍ കുന്നിയൂര്‍ നരേഷ് കുമാര്‍, വി.പി ഗോപാലകൃഷ്ണന്‍ പങ്കെടുത്തു.