ടെസ്റ്റുകളില്ലമുംബൈ: ന്യൂസിലന്‍ഡിനെതിരായ ഇന്ത്യന്‍ ടീമിന്റെ പരമ്പരയില്‍ ഡേ-നൈറ്റ് ടെസ്റ്റുകളില്ല. പരമ്പരയില്‍ മൂന്നു ടെസ്റ്റുകളാണുള്ളതെന്ന് ബി.സി.സി.ഐ പ്രസിഡന്റ് അനുരാഗ് ഠാക്കൂര്‍ വ്യക്തമാക്കി. സെപ്റ്റംബറിലാണ് പരമ്പര ആരംഭിക്കുന്നത്. അഞ്ചു ഏകദിനങ്ങളും പരമ്പരയിലുണ്ട്.
സീസണില്‍ ഇന്ത്യയില്‍ വച്ചുള്ള നാലു സുപ്രധാന പരമ്പരകളില്‍ ആദ്യത്തേത്താണ് ഇത്. സെപ്റ്റംബര്‍ 22നു നടക്കുന്ന ആദ്യ ടെസ്റ്റിന് കാണ്‍പൂര്‍ വേദിയാകും. സ്‌പെറ്റംബര്‍ 30നു നടക്കുന്ന രണ്ടാം ടെസ്റ്റിന് കൊല്‍ക്കത്തയിലെ ഈഡന്‍ ഗാര്‍ഡന്‍സും ഒക്ടോബര്‍ എട്ടിനു നടക്കുന്ന പരമ്പരയിലെ അവസാന ടെസ്റ്റിന് ഇന്‍ഡോറും വേദിയാകും. ആദ്യമായിട്ടാണ് ഇന്‍ഡോര്‍ ടെസ്റ്റ് മത്സരങ്ങള്‍ക്ക് വേദിയാകുന്നത്.
ഒക്ടോബര്‍ 16ന് ധര്‍മശാലയില്‍ നടക്കുന്ന മത്സരത്തോടെയാണ് ഏകദിന പരമ്പരയ്ക്ക് തുടക്കം കുറിക്കുക. ഒക്ടോബര്‍ 19നു ഡല്‍ഹി, ഒക്ടോബര്‍ 23നു മൊഹാലി, ഒക്ടോബര്‍ 26നു റാഞ്ചി ഒക്ടോബര്‍ 29നു വിശാഖപട്ടണം എന്നിവയാണ് മറ്റു വേദികള്‍. അതേസമയം ഡേ-നൈറ്റ് ടെസ്റ്റുകളുടെ കാര്യത്തില്‍ തിരക്കിട്ട നീക്കം നടത്തില്ലെന്ന് ഠാക്കൂര്‍ പറഞ്ഞു.