ഇരിങ്ങാലക്കുട: സെന്റ് ജോസഫ്‌സ് നാഷണല്‍ സര്‍വ്വീസ് സ്‌കീം യൂണിറ്റുകളുടെ നേതൃത്വത്തില്‍ നടന്ന വിവിധ കര്‍മപദ്ധതികളുടെ സമാപനം 'സപര്യ 2017 ' എന്‍.എസ്.എസ്. റീജിയണല്‍ ഡയറക്ടര്‍ ഡോ. സജിത്ത് ബാബു ഉദ്ഘാടനം ചെയ്തു. എന്‍.എസ്.എസും വേളൂക്കര പഞ്ചായത്തും സംയുക്തമായി നടത്തുന്ന സ്‌നേഹത്തണലിന്റെ ഭാഗമായി നിര്‍മിച്ച വീടിന്റെ താക്കോല്‍ ദാനം നിര്‍വഹിച്ചു.
ജൈവകൃഷിയിലൂടെ വളണ്ടിയര്‍മാര്‍ സമാഹരിച്ച തുക ഡയാലിസിസ് രോഗികള്‍ക്കായി ആരംഭിച്ച 'നന്മക്കൈനീട്ടം' പദ്ധതിയിലൂടെ വിതരണം ചെയ്തു. കുട്ടികള്‍ ശേഖരിച്ച തുക കൊണ്ട് വാങ്ങിയവീല്‍ചെയര്‍ ചടങ്ങില്‍ വെച്ച് നല്‍കി. മുകുന്ദപുരം എല്‍ .പി.സ്‌കൂളിന് വേണ്ടി പുസ്തകവും അലമാരയും സമ്മാനിക്കുന്ന 'അറിവിന്‍ നിറവിന്റെ ' ഉദ്ഘാടനം കോളജ് മുന്‍ പ്രിന്‍സിപ്പല്‍ ഡോ.സി.ആനി കുര്യാക്കോസ് നിര്‍വഹിച്ചു.
കാന്‍സര്‍ രോഗികള്‍ക്ക് വിഗ്ഗ് നിര്‍മിക്കുന്നതിനായി വളണ്ടിയര്‍മാര്‍ സംഭാവന ചെയ്ത മുടി എന്‍.എസ്.എസ്. ജില്ലാ കോര്‍ഡിനേറ്റര്‍ രമേശ്.ടി.എന്‍. ഏറ്റുവാങ്ങി. ചടങ്ങില്‍ എന്‍.എസ്.എസില്‍ നിന്ന് വിരമിക്കുന്ന സുമിന എം.എസിനെ ആദരിച്ചു. കോളജ് വൈസ് പ്രിന്‍സിപ്പമാരായ സി. ഇസബെല്‍, സി. ലില്ലി കാച്ചപ്പിള്ളി, വേളൂക്കര പഞ്ചായത്ത് പ്രസിഡന്റ് ഇന്ദിരാ തിലകന്‍, വൈസ് പ്രസിഡന്റ് ടി.ആര്‍ സുനില്‍, അഞ്ജു ആന്റണി, ഗായത്രിദേവി കെ.യു, ജോസ്മി വര്‍ഗീസ് സംസാരിച്ചു.