കൊളത്തൂര്‍: കൊളത്തൂരിലെ നിപാ വൈറസ് മരണം, ആശുപത്രി അധികൃതര്‍ക്കെതിരേ ഗുരുതര ആരോപണങ്ങളുമായി കുടുംബം രംഗത്ത്. പ്രമേഹരോഗിയായ വേലായുധനെ മരണപ്പെടുന്നതിനു 14 ദിവസം മുന്‍പാണ് പുറം ഭാഗത്ത് വട്ടത്തിലുള്ള മുറിവുമായി പെരിന്തല്‍മണ്ണ ജില്ലാ ആശുപത്രിയിലെത്തിക്കുന്നത്.
ആശുപത്രിയിലെത്തി ദിവസങ്ങള്‍ കഴിഞ്ഞിട്ടും സര്‍ജറി നടത്താതെ കിടത്തുകയായിരുന്നു. പ്രമേഹരോഗിയായ വേലായുധന്റെ മുറിവ് സര്‍ജറി നടത്താന്‍ ഡോക്ടര്‍മാരില്ലെന്നും ഉള്ളവര്‍ക്കെല്ലാം തിരക്കാണെന്നുമാണ് ആശുപത്രിയിലെ പ്രധാന ഡോക്ടര്‍ ബന്ധുക്കളോട് പറഞ്ഞത്. നിരന്തരമായ ബന്ധുക്കളുടെ ഇടപെടല്‍ മൂലം അഞ്ചാം ദിവസമാണ് വേലായുധനെ സര്‍ജറിക്ക് വിധേയനാക്കുന്നത്. തുടര്‍ന്ന് സര്‍ജറി കഴിഞ്ഞ് യാതൊരു സുരക്ഷയുമില്ലാത്ത വാര്‍ഡില്‍ കിടത്തിയെന്നും ഇത്രയും അപകടകരമായ സ്ഥിതിയിലുള്ള രോഗിയെ ഡെങ്കിപ്പനിയുമായി ആശുപത്രിയില്‍ ചികിത്സയില്‍ കഴിയുന്നവരോടൊപ്പമാണ് കിടത്തിയിരുന്നുവെന്നാണ് ബന്ധുക്കള്‍ ആരോപിക്കുന്നത്. തുടര്‍ന്ന് ആറാം ദിവസമാണ് വേലായുധന് പനിപിടിപ്പെട്ടതെന്നുമാണ് ബന്ധുക്കള്‍ പറയുന്നത്. മൂന്നു ദിവസത്തോളം പനിപിടിച്ച് ആശുപത്രിയില്‍ കഴിഞ്ഞതോടെ ആശുപത്രിയിലെ സുരക്ഷയില്ലായ്മ ബോധ്യപ്പെട്ട ബന്ധുക്കള്‍ രാത്രി പതിനൊന്നോടെ കോഴിക്കോട് മെഡിക്കല്‍ കോളജിലേക്ക് മാറ്റുകയായിരുന്നു. തുടര്‍ന്ന് പതിനാലാം ദിവസമാണ് വേലായുധന്‍ മരണപ്പെടുന്നത്. അച്ചന് ഇത്രയും വലിയ അസുഖമുണ്ടണ്ടായിട്ടും ഞങ്ങള്‍ക്ക് യാതൊരുവിധ അറിയിപ്പും ആശുപത്രി അധികൃതര്‍ നല്‍കിയില്ലെന്നും മരണപ്പെട്ട വേലായുധന്റെ മകന്‍ വിജീഷ് പറഞ്ഞു.