കൊല്ലം: പരിസ്ഥിതി സംരക്ഷണ- മാലിന്യ നിര്‍മാര്‍ജ സന്ദേശവുമയി കൊല്ലത്തുകാര്‍ക്ക് കാഴ്ചയുടെ വ്യത്യസ്ത വിരുന്നൊരുക്കുകയാണ് 'വിദാഷ് 2018' ഡിസൈന്‍ ഫെസ്റ്റ്. കേരള സ്റ്റേറ്റ് ഇന്‍സ്റ്റിറ്റ്യൂട്ടിലെ വിദ്യാര്‍ഥികള്‍ അഞ്ചിടങ്ങളിലായി അഞ്ച് വ്യത്യസ്ത പരിപാടികളാണ് നാളെയും മറ്റന്നാളുമായി നടക്കുന്ന പരിപാടിയുടെ ഭാഗമായി ഒരുക്കിയിരുക്കുന്നത്.
പഴയതും പുതിയതുമായ ജീവിത രീതികളെ ആസ്പദമാക്കിയുള്ള പെയിന്റിങ് മത്സരം 'നൊസ്റ്റാള്‍ജിയ', കടല്‍ത്തീരം ശുചിയാക്കലും മാലിന്യവസ്തുക്കള്‍ കൊണ്ടുള്ള ഇന്‍സ്റ്റലേഷനും സാന്‍ഡ് ആര്‍ട്ടുമടങ്ങുന്ന 'മേര്‍ജിങ് ഗ്രെയിന്‍സ്', ഒറിഗാമിയിലൂടെ പ്രകൃതിയുടെ സന്തുലനാവസ്ഥ കുട്ടികളിലേക്കെത്തിക്കുന്ന 'ക്രിങ്കിള്‍', മാലിന്യമുക്തമായ ജീവിതത്തിന്റെ അവബോധമുണര്‍ത്തുന്ന ഇന്‍സ്റ്റലേഷന്‍ 'ജങ്ക് പാര്‍ക്ക് ', കുട്ടികളുടെ 'കള്‍ച്ചറല്‍ നൈറ്റ് ' എന്നിവയാണ് വിദാഷ് 2018 ന്റെ ഭാഗമായി ഒരുക്കിയിരിക്കുന്നത്.
കൊല്ലം ചിന്നക്കട ശ്രീ സാംബശിവന്‍ ബ്രിഡ്ജില്‍ 26ന് നൊസ്റ്റാള്‍ജിയ മത്സരങ്ങള്‍ നടക്കും, ഒന്നാം സമ്മാനം 15000 രൂപയുടെ ക്യാഷ് അവാര്‍ഡാണ്. മേര്‍ജിങ് ഗ്രെയിന്‍സ് അന്നേ ദിവസം കൊല്ലം ബീച്ചില്‍ സംഘടിപ്പിക്കും.ക്രിങ്കില്‍ 27ന് ആശ്രാമം മൈതാനത്തുള്ള കുട്ടികളുടെ പാര്‍ക്കിലാണ് നടക്കുക. കെ.എസ്.ആര്‍.ടി.സി ബസ്റ്റാന്‍ഡിനു സമീപത്താണ് ജങ്ക് പാര്‍ക്ക് ഇന്‍സ്റ്റലേഷന്‍ സ്ഥാപിക്കുക.
അതിനൊപ്പം മാലിന്യ നിര്‍മാര്‍ജന ബോധവല്‍കരണ പരിപാടികളും നടത്തും. തുടര്‍ന്ന് ചന്ദനത്തോപ്പിലെ കെ.എസ്.ഐ.ഡി കാംപസില്‍ വിദ്യാര്‍ഥികളുടെ കള്‍ച്ചറല്‍ ഫെസ്റ്റും സമ്മാനദാനവും നടക്കും. ചടങ്ങില്‍ മുകേഷ് എം.എല്‍.എ, മേയര്‍ രാജേന്ദ്രബാബു, ചലച്ചിത്ര താരങ്ങളായ വിജയ് ബാബു, കുക്കു പരമേശ്വരന്‍, ജില്ലാ കലക്ടര്‍ കാര്‍ത്തികേയന്‍, കെ.എ.എസ്.ഇ എം.ഡി ശ്രീറാം വെങ്കിട്ടരാമന്‍ സംബന്ധിക്കും.