കൊച്ചി: ദേഹാസ്വാസ്ഥ്യത്തെത്തുടര്‍ന്നു സുപ്രിംകോടതിയിലെ മുതിര്‍ന്ന അഭിഭാഷകനും മുന്‍ കേന്ദ്രമന്ത്രിയുമായ രാം ജത്്മലാനിയെ കൊച്ചിയിലെ ലേക് ഷോര്‍ ആശുപത്രിയില്‍ പ്രവേശിപ്പിച്ചു. ഇന്നലെ ഉച്ചയ്ക്ക് 12.30നാണ് അദ്ദേഹം താമസിച്ചിരുന്ന ഹോട്ടലില്‍ വച്ച് ദേഹാസ്വാസ്ഥ്യമുണ്ടായത്.
തുടര്‍ന്നു ആശുപത്രിയിലേക്കു മാറ്റി. വിദഗ്ധ പരിശോധന നടത്തി 24 മണിക്കൂര്‍ നിരീക്ഷണവിഭാഗത്തിലേക്കു മാറ്റി. കൊച്ചിയില്‍ അഭിഭാഷകര്‍ സംഘടിപ്പിച്ച പരിപാടിയില്‍ പങ്കെടുക്കാന്‍ എത്തിയതായിരുന്നു രാജ്യസഭാംഗം കൂടിയായ ജത്മലാനി. ആരോഗ്യനില വീണ്ടെടുത്ത അദ്ദേഹത്തിന് ഇന്ന് ഡല്‍ഹിയിലേക്കു മടങ്ങാനാകുമെന്ന് ലേക് ഷോര്‍ സി.ഇ.ഒ എസ്.കെ അബ്ദുല്ല പറഞ്ഞു.