കാസര്‍കോട്: ബി.ജെ.പി നേതാവായിരുന്ന അഡ്വ. സുഹാസ് അനുസ്മരണത്തോടനുബന്ധിച്ചുള്ള പരിപാടിയില്‍ ദക്ഷിണ കന്നഡ എം.പി നളിന്‍കുമാര്‍ കട്ടീല്‍ നടത്തിയ പ്രസംഗത്തിന്റെ സി.ഡി പൊലിസ് പരിശോധിക്കും.
പരിപാടിയുടെ ഉദ്ഘാടകനായിരുന്ന എം.പി പ്രകോപനപരമായ പ്രസംഗം നടത്തിയെന്ന ആരോപണത്തെ തുടര്‍ന്നാണു പഴയ ചൂരി ഇസ്സത്തുല്‍ ഇസ്‌ലാം മദ്‌റസാ അധ്യാപകന്‍ മുഹമ്മദ് റിയാസ് മുസ്‌ലിയാര്‍ വധക്കേസ് അന്വേഷിക്കുന്ന പ്രത്യേക സംഘം ഇതു പരിശോധിക്കുന്നത്. പ്രതികള്‍ക്കു നളിന്‍ കുമാറിന്റെ പ്രസംഗം പ്രചോദനമായോയെന്നും പരിശോധിക്കും.
കഴിഞ്ഞ 18നു താളിപ്പടുപ്പ് മൈതാനിയില്‍ അഡ്വ. സുഹാസ് അനുസ്മരണത്തോടനുബന്ധിച്ച് നടത്തിയ കബഡി ടൂര്‍ണമെന്റ് ഉദ്ഘാടനം ചെയ്യവെയായിരുന്നു നളിന്‍ കട്ടീലിന്റെ പ്രസംഗം. റിയാസ് മുസ് ലിയാരുടെ കൊലക്കു പിന്നാലെ ഇന്നലെ ജില്ലയില്‍ വിവിധ മേഖലയില്‍ പൊലിസ് റെയ്ഡ് നടത്തി. ചൗക്കി പെരിയടുക്കയില്‍ നിന്ന് ആയുധങ്ങളും പൊലിസ് പിടിച്ചെടുത്തു.