മനാമ: സുപ്രഭാതം മുന്‍ ചെയര്‍മാനും സമസ്ത സെക്രട്ടറിയുമായ ശൈഖുനാ കോട്ടുമല ബാപ്പു മുസ്ലിയാരുടെ പേരില്‍ ഗള്‍ഫ് സത്യധാര പുറത്തിറക്കിയ അനുസ്മരണ സ്‌പെഷല്‍ പതിപ്പിന്റെ ബഹ്‌റൈന്‍ തല പ്രകാശനം മനാമയില്‍ നടന്നു.
മനാമ ഗോള്ഡ് സിറ്റിയിലെ സമസ്ത ബഹ്‌റൈന്‍ കേന്ദ്ര ആസ്ഥാനത്ത് നടന്ന ചടങ്ങില്‍ സമസ്ത ബഹ്‌റൈന്‍ സെക്രട്ടറി എസ്.എം.അബ്ദുല്‍ വാഹിദ് എന്‍.ടി.കെ അബ്ദുല്‍ കരീം തിക്കോടിക്ക് നല്‍കിയാണ് പ്രകാശനം നിര്‍വ്വഹിച്ചത്.
സെക്രട്ടറി ഖാസിം റഹ്മാനി പടിഞ്ഞാറത്തറ പുസ്തക പരിചയം നടത്തി സംസാരിച്ചു.
മതഭൗതിക രംഗങ്ങളില്‍ പ്രശോഭിച്ചിരുന്ന കോട്ടുമല ബാപ്പു മുസ്ലിയാരുടെ ജീവിതാനുഭവങ്ങളും ജീവിത സന്ദേശവും 100 ല്‍ പരം പേജുകളിലായി സവിസ്തരം പ്രതിപാദിക്കാന്‍ അണിയറ പ്രവര്‍ത്തകര്‍ക്ക് കഴിഞ്ഞിട്ടുണ്ടെന്നും സമുദായത്തിന്റെയും നാടിന്റെയും ശോഭനമായ ഭാവി ലക്ഷ്യം വെച്ച് പ്രവര്‍ത്തിക്കുന്ന സാമൂഹ്യ പ്രവര്‍ത്തകര്‍ക്കും വിശ്വാസികള്‍ക്കും തികഞ്ഞ ഒരു റഫറന്‍സ് ഗ്രന്ഥമായി ഇത് ഉപയോഗപ്പെടുത്താമെന്നും അദ്ധേഹം അഭിപ്രായപ്പെട്ടു.
പുസ്തകത്തിന്റെ പരിമിതമായ കോപ്പികള്‍ മാത്രമാണ് സ്റ്റോക്കുള്ളതെന്നും ഗള്‍ഫ് സത്യധാര വരിക്കാരും വിവിധ ഏരിയാ കമ്മറ്റികളും അവരവരുടെ കോപ്പികള്‍ ഉടനെ കൈപ്പറ്റണമെന്നും ബന്ധപ്പെട്ടവര്‍ അറിയിച്ചു. കൂടുതല്‍ വിവരങ്ങള്‍ക്ക് +97333832786