കോഴിക്കോട്: സുനാമി പുനരധിവാസ പാക്കേജില്‍ ഉള്‍പ്പെടുത്തി ചേമഞ്ചേരി വില്ലേജില്‍ പണിത 25 വീടുകള്‍ അര്‍ഹതപ്പെട്ട ഗുണഭോക്താക്കള്‍ക്ക് കൈമാറുന്നതിനു നടപടികളാവുന്നു.
ജില്ലാ കലക്ടര്‍ യു.വി ജോസിന്റെ അധ്യക്ഷതയില്‍ കലക്ടറേറ്റില്‍ ചേര്‍ന്ന ജനപ്രതിനിധികളുടെയും ഉദ്യോഗസ്ഥരുടെയും യോഗത്തിലാണ് ഇതുസംബന്ധിച്ച് ധാരണയായത്.
ഗുണഭോക്താക്കളെ നിശ്ചയിച്ച് പഞ്ചായത്ത് തീരുമാനം സഹിതം ലിസ്റ്റ് കൊയിലാണ്ടി തഹസില്‍ദാര്‍ക്ക് സമര്‍പ്പിക്കാന്‍ ചേമഞ്ചേരി പഞ്ചായത്ത് സെക്രട്ടറിക്ക് നിര്‍ദേശം നല്‍കി.
ഏപ്രില്‍ 21 ന് ചേരുന്ന ജില്ലാതല യോഗത്തില്‍ ലിസ്റ്റിന് അംഗീകാരം നല്‍കും. സുനാമി പാക്കേജില്‍ ഉള്‍പ്പെടുത്തി പണി പൂര്‍ത്തിയാക്കിയ വീടുകള്‍ ഭവന നിര്‍മാണ ബോര്‍ഡ് 2012 മെയ് മാസത്തില്‍ റവന്യൂ വകുപ്പിന് കൈമാറിയിരുന്നു. വെള്ളവും വൈദ്യുതി കണക്ഷനും ഇല്ലാത്തതിനാല്‍ വീടുകള്‍ ഗുണഭോക്താകള്‍ക്ക് നല്‍കിയിരുന്നില്ല,
ഇതേ തുടര്‍ന്ന് സാമൂഹ്യവിരുദ്ധര്‍ വീടുകള്‍ കേടുപാടുകള്‍ വരുത്തിയിരുന്നു. വീടുകള്‍ കൈമാറുന്നതിനും അറ്റകുറ്റപ്പണികള്‍ നടത്തുന്നതിനുമാണ് ഇപ്പോള്‍ തീരുമാനമായിട്ടുള്ളത്.
യോഗത്തില്‍ കൊയിലാണ്ടി മുനിസിപ്പല്‍ ചെയര്‍മാന്‍ അഡ്വ. കെ. സത്യന്‍, ചേമഞ്ചേരി പഞ്ചായത്ത് പ്രസിഡന്റ് അശോകന്‍ കോട്ട്, ഡെപ്യൂട്ടി കലക്ടര്‍ ബി. അബ്ദുന്നാസര്‍, തഹസില്‍ദാര്‍ എന്‍. റംല പങ്കെടുത്തു.