തിരുവമ്പാടി: പുല്ലുരാംപാറ മലബാര്‍ സ്‌പോര്‍ട്‌സ് അക്കാദമിയും ഒയിസ്‌ക തിരുവമ്പാടിയും സംഘടിപ്പിക്കുന്ന ഉത്തര കേരള വോളിബോള്‍ മേളക്ക് ഇന്ന് തിരുവമ്പാടിയില്‍ തുടക്കമാവും.
 മലബാര്‍ സ്‌പോര്‍ട്‌സ് അക്കാദമിയുടെ പരിശീലകനായിരുന്ന മനോജ് മാത്യുവിന്റെ സ്മരണാര്‍ഥമാണ് മത്സരം സംഘടിപ്പിച്ചത്.
കൂടരഞ്ഞി റോഡില്‍ ഒരുക്കിയ കൊട്ടാരത്തില്‍ മിനി ഫ്‌ളഡ്‌ലിറ്റ് സ്റ്റേഡിയത്തിലാണ് മേള നടക്കുന്നത്.
രാത്രി ഏഴിന് തുടങ്ങുന്ന മത്സരം തിരുവമ്പാടി എം.എല്‍.എ ജോര്‍ജ് എം.തോമസ് ഉല്‍ഘാടനം ചെയ്യും.
മലബാര്‍ സ്‌പോര്‍ട്‌സ് അക്കാദമിയില്‍ കായികപരിശീലനം നടത്തുന്ന കുട്ടികളെ സഹായിക്കുക എന്നതാണ് മേളയുടെ ലക്ഷ്യം. മേളയുടെ അവസാനദിനം പ്രമുഖ വനിത ടീമുകളുടെ പ്രദര്‍ശന മത്സരവും നടക്കും.