യുവേഫ ചാമ്പ്യന്‍സ് ലീഗിന്റെ ഫൈനല്‍ പോരാട്ടത്തിനിടെ തോളെല്ലിനു പരുക്കേറ്റ ലിവര്‍പൂള്‍ താരം മുഹമ്മദ് സലാഹിന് ലോകകപ്പ് കളി നഷ്ടമാവുമോയെന്ന് ആശങ്ക. ഡോക്ടര്‍മാര്‍ വിശ്രമം ആവശ്യപ്പെട്ടിട്ടുണ്ടെന്നാണ് ഇപ്പോള്‍ പുറത്തുവരുന്ന റിപ്പോര്‍ട്ടുകള്‍. എന്നാല്‍ ഇക്കാര്യത്തില്‍ വ്യക്തത വന്നിട്ടില്ല.

അതിനിടെ, പരുക്കിന് കാരണമായ സെര്‍ജിയോ റാമോസ്, സലാഹിന് സുഖം നേര്‍ന്നുകൊണ്ട് സന്ദേശം അയച്ചു. അതിവേഗം സുഖം പ്രാപിക്കട്ടേയെന്ന് റാമോസ് ആശംസിച്ചു.

റയല്‍ മാഡ്രിഡ് ക്യാപ്റ്റന്‍ റാമോസുമായി കൂട്ടിയിടിച്ചാണ് സലാഹിന്റെ തോളിന് പരുക്കുപറ്റുകയും കരഞ്ഞുകൊണ്ടു കളം വിടുകയും ചെയ്തത്.

അടുത്ത മാസം 14 മുതല്‍ റഷ്യയില്‍ നടക്കുന്ന ഫിഫ ലോകകപ്പില്‍ ഈജിപ്ഷ്യന്‍ ടീമിനെ പ്രതിനിധീകരിച്ചാണ് സലാഹ് കളിക്കേണ്ടിയിരുന്നത്. സീസണില്‍ 44 ഗോളുകള്‍ നേടി മിന്നിത്തിളങ്ങിയ സലാഹ് ലോകകപ്പില്‍ ഈജിപ്തിന്റെ വലിയ പ്രതീക്ഷയായിരുന്നു. സലാഹ് സുഖംപ്രാപിച്ച് തിരിച്ചെത്തുമെന്നാണ് പ്രതീക്ഷയെന്ന് ഈജിപ്ത് കായികമന്ത്രി പറഞ്ഞു.